नेपाल प्रिमियर लिग एनपीएल क्रिकेटमा सोमबार दुई खेल हुँदैछन् । विहान ११; ४५ मा शुरु हुने आजको पहिलो खेलमा दुई छिमेकी टोली विराटनगर किंग्स र जनकपुर बोल्ट्स खेल्नेछन् । विराटनगरले खेलेका दुई मध्ये दुबै खेलमा जीत हात पार्दै उपाधीमाथिको बलियो दाबेदारी पेश गरेको छ भने गत सिजनको बिजेता रहेको जनकपुरले पहिलो खेलमा काठमाडौँ गोर्खाजसँग पराजय ब्यहोरेको छ । विराटनगरले भनेपोखरा एभेन्जर्स र काठमान्डु गोर्खाजलाई हराएको छ । सन्दीप लामिछानेको नेतृत्वमा रहेको बिराटनगरमा जर्ज मुन्सी, मर्चेन्ट डी ल्याङ्गेऽ मार्टिन गुप्टिल शुभम रञ्जने जस्ता विदेशी खेलाडीले गजबको प्रदर्शन गरिरहेका छन् । यस्तै लामिछाने सहित लोकेश बम सूर्य तामाङलगायतले पनि राम्रो खेलिरहेका छन् । विराटनगरमा अनुबन्ध भएका एनपीएलका सबैभन्दा हाइ प्रोफाइल खेलाडी दक्षिण अफ्रिकाका फाफ डु प्लेसिस भने अझै आइपुगेका छैनन् । उनको आगमनले टोली अझ बलियो हुने विश्वास टोलीको छ । वेस्ट इन्डिजका ब्याटिङ भेट्रान शिवनारायण चन्द्रपौललाई प्रशिक्षक बनाएको साबिक विजेता जनकपुरले भने सोचेजस्तो खेल्न सकेको छैन । भलै उसले एक खेल मात्र खेलेको छ ।

लफ्टी इटन, सञ्जय कृष्णमुर्थी, यान निकोल जस्ता विदेशी खेलाडीका साथै आरिफ शेख, ललित राजवंशी र अनिल साह जस्ता अनुभवी खेलाडी रहेको जनकपुरमा किशोर महतो र रूपेश सिंह जस्ता भरोसायोग्य युवा खेलाडी पनि छन् ।
बेलुका ४ बजे शुरू हुने आजको दोस्रो खेलमा दुई छिमेकी कर्णाली याक्स र सुदुरपश्चिम रोयल्स खेल्नेछन् । दीपेन्द्रसिंह ऐरीको कप्तानी जगत टमाटाको प्रशिक्षणमा रहेको सुदूरपश्चिम यसअघिका २ मध्ये दुबै खेल जित्दै तालिकाको पहिलो स्थानमा रहेको छ । सुदुरपश्चिमले काठमाडौँ गोर्खाज र पोखरा एभेन्जर्सलाई हराउँदै उपाधिमाथिको दाबेदारी पेश गरेको छ । स्मरण रहोस् सुदुरपश्चिम गत सिजनको उपविजेता टोली हो । सुदुरपश्चिममा जस ब्राउन, क्रिस लिन, हरमित सिंहऽ स्कट कुग्लेनिन लगायत विदेशी खेलाडीका साथै विनोद भण्डारी, आरिफ शेख हेमन्त धामी, ईशान पाण्डे जस्ता खेलाडी रहेका छन् ।
पहिलो खेलमै चितवन राइनोजसँग पराजित भए पनि कर्णाली याक्सले आफ्नो दोस्रो खेलमा लुम्बिनी लायन्सलाई हराएको थियो । जुन खेलमा स्कटिस मार्क वाटले ४४ बलमा अविजित १ सय १४ रनको योगदान गरेका थिए । यो जारी प्रतियोगिताको अहिलेसम्मको एक मात्र शतक पनि हो ।
आजको खेलमा सुदुरपश्चिम र विराटनगर विजयी भएमा प्ले अफ पुग्ने सम्भावना बलियो बन्ने छ । तर जनकपुर र कर्णाली विजयी भएमा यो होड थप रोचक बन्ने छ ।