काठमाडौं– चालु आर्थिक वर्ष (आव)को दुई महिनामा अघिल्लो आवको सोही अवधिको तुलनामा नेपालको वैदेशिक व्यापारमा वृद्धि भएको छ । भन्सार विभागको तथ्यांकअनुसार समीक्षा अवधिमा नेपालको आयात र निर्यात दुवै वृद्धि भएको हो ।
विभागको तथ्यांकअनुसार चालु आवको दुई महिनामा नेपालमा ३ खर्ब ५ अर्ब १५ करोड ५० लाख ९९ हजार रुपैयाँको वस्तु आयात भएको छ । सो आयात अघिल्लो आवको सोही अवधिको तुलनामा १६.२३ प्रतिशतले धेरै हो । अघिल्लो आवको सोही अवधिमा २ खर्ब ६२ अर्ब ५४ करोड २६ लाख २६ हजार रुपैयाँको वस्तु आयात भएको थियो ।
त्यस्तै, चालु आवको दुई महिनामा नेपालबाट ४७ अर्ब ३१ करोड ७६ लाख ६३ हजार रुपैयाँको वस्तु निर्यात भएको छ । जुन निर्यात अघिल्लो आवको सोही अवधिको तुलनामा ८८.५७ प्रतिशतले धेरै हो । अघिल्लो आवको सो अवधिमा नेपालबाट २५ अर्ब ९ करोड ३१ लाख ३ हजार रुपैयाँ बराबरको वस्तु निर्यात भएको थियो ।
आयात र निर्यात दुवैतर्फ वृद्धि हुँदा चालु आवको पहिलो दुई महिनामा अघिल्लो आवको सोही अवधिको तुलनामा नेपालको वैदेशिक व्यापार बढ्न पुगेको छ ।
चालु आवको दुई महिनामा नेपालको कुल वैदेशिक व्यापार ३ खर्ब ५२ अर्ब ४७ करोड २७ लाख ६१ हजार रुपैयाँ बराबरको भएको छ । जुन परिमाण अघिल्लो आवको सोही अवधिको तुलनामा २२.५४ प्रतिशतले धेरै हो । अघिल्लो आवको सोही अवधिमा नेपालको वैदेशिक व्यापार २ खर्ब ८७ अर्ब ६३ करोड ५७ लाख २८ हजार रुपैयाँ बराबरको भएको थियो ।
आयात निर्यातमा सोयाबिन तेलको कच्चा पदार्थ अगाडि
भन्सार विभागको तथ्यांकअनुसार चालु आवको पहिलो दुई महिनामा सबैभन्दा धेरै आयात र निर्यात हुने वस्तुमा सोयाबिन तेलको कच्चा पदार्थ अगाडि देखिएको थियो ।
चालु आवको दुई महिनामा २१ अर्ब ६४ करोड ७७ लाख ८१ हजार रुपैयाँको सोयाबिन तेलको कच्चा पदार्थ आयात भएको छ । त्यस्तै, सो अवधिमा २० अर्ब ४२ करोड २ लाख २८ हजार रुपैयाँ बराबरको सोयाबिन तेलको कच्चा पदार्थ निर्यात भएको छ ।
समीक्षा अवधिमा कार्पेट टेक्सटाइल, सुर्यमुखी तेल, पामको तेल निर्यातको शिर्ष स्थानमा छन् भने सोयाबिन तेलपछि रासायनिक मल, डिजेल र पेट्रोल आयातको शिर्ष स्थानमा छन् ।
