काठमाडौं – सरकारले आज (शुक्रबार) विभिन्न १३ देशका लागि नयाँ राजदूत सिफारिस गर्ने तयारी गरेको छ। प्रधानमन्त्री बालेन्द्र (बालेन) शाहले बोलाएको मन्त्रिपरिषद् बैठकले लामो समयदेखि रिक्त रहेका नेपाली कूटनीतिक नियोगमा राजदूत नियुक्तिका लागि सिफारिस गर्ने तयारी गरेको हो।
संयुक्त राष्ट्रसंघको ८१औँ महासभामा सहभागी हुन आगामी असोज ६ गते न्युयोर्क प्रस्थान गर्नुअघि प्रधानमन्त्री शाहले कुल २१ देशका लागि राजदूत सिफारिस गर्ने तयारी गरेका छन्।
सरकारले गत जेठमा खुला आवेदन आह्वान गरी प्राप्त आवेदनमध्येबाट प्रतिस्पर्धाका आधारमा १३ देशका लागि राजदूत छनोट गरेको जनाएको छ। बाँकी आठ देशमा भने परराष्ट्र मन्त्रालयका वरिष्ठ सहसचिवलाई राजदूतका रूपमा सिफारिस गर्ने तयारी छ।
लामो समयदेखि रिक्त रहेका नेपाली कूटनीतिक नियोगमा योग्य र सक्षम व्यक्तिलाई खुला प्रतिस्पर्धामार्फत छनोट गर्ने सरकारको तयारीलाई चासोका साथ हेरिएको छ। यससँगै चार महिनादेखि अघि बढेको राजदूत छनोट प्रक्रिया टुंगोमा पुग्ने अधिकारीहरूले बताएका छन्।
हाल अमेरिका, चीन, भारत, अस्ट्रेलिया, जर्मनी, इजरायल, जापान, दक्षिण कोरिया, मलेसिया, ओमान, बेलायत, कतार, रुस, साउदी अरेबिया, श्रीलङ्का र स्पेनलगायतका देशमा नेपाली राजदूतको पद रिक्त छ।
