काठमाडौं। रसुवामा आएको भीषण बाढीपछि नेपाली सेनाले उद्धार कार्य तीव्र बनाएको छ। सेनाको हवाई उद्धार टोलीले आइतबार अपराह्न ३ बजेसम्म १६ विदेशी नागरिकसहित ४०९ जनाको हवाई उद्धार गरेको छ।
उद्धार गरिएका विदेशी नागरिकमा १५ चिनियाँ र एक भारतीय नागरिक छन्।
यसैबीच, त्रिशूली–३ जलविद्युत् आयोजनाको टनेलमा फसेकाहरूको उद्धारका लागि विशेषज्ञसहितको संयुक्त टोली निरन्तर परिचालित छ। भदौ १२ गतेदेखि अस्थायी बेसक्याम्प स्थापना गरी खटिएको टोलीले ड्रिलिङ मेसिन, स्काभेटर र हाइड्रोलिक कटरलगायत उपकरण प्रयोग गरेर टनेलको ‘क्राउन हेड’ फेला पारेको सेनाले जनाएको छ।
टनेलमा बनाइएको प्वालबाट गरिएको निरीक्षणका क्रममा करिब ७ मिटर व्यासको सुरुङभित्र पानीको सतह निकै माथिसम्म रहेको प्राविधिक टोलीले जनाएको छ। त्यसपछि उद्धारका लागि आवश्यक प्राविधिक कामलाई निरन्तरता दिइएको छ।
बाढी तथा अन्य प्राकृतिक विपद्बाट प्रभावित विभिन्न जिल्लामा नेपाली सेनाले करिब ८ हजार ५ सयभन्दा बढी जनशक्ति परिचालन गरेको छ। अन्य सुरक्षा निकाय तथा सरोकारवाला संस्थासँगको समन्वयमा सेनाले प्रभावित क्षेत्रमा प्राथमिकताका आधारमा खोजी, उद्धार तथा राहत कार्य जारी राखेको जनाएको छ।
