काठमाडौं। नेपाली कांग्रेसका नेता जगदीश्वरनरसिंह केसीले नुवाकोट, रसुवा र धादिङका बाढीपहिरो प्रभावित क्षेत्रमा राहत तथा उद्धार प्रभावकारी हुन नसकेको बताएका छन्। विपद्का बेला राज्यको उपस्थिति कमजोर देखिएको र पीडितले सरकार भएको अनुभूति गर्न नपाएको उनको दाबी छ।
कांग्रेस केन्द्रीय कार्यालय सानेपामा आयोजित पदाधिकारी तथा केन्द्रीय सदस्यहरूको बैठकमा केसीले प्रभावित क्षेत्रको स्थलगत अवस्थाबारे जानकारी दिँदै भैरमकोट, केउरिनी, बुढासिंह घाट र त्रिशूली बजार आसपासका हजारौँ नागरिक विस्थापित भएर विद्यालय तथा कभर्ड हलमा आश्रय लिइरहेको बताए।
उनका अनुसार त्रिशूली नदीपारिका कतिपय क्षेत्रमा विद्युत् सेवा अझै अवरुद्ध छ। अस्पतालमा जेनेरेटरको अभाव हुँदा उपचार सेवा प्रभावित भएको उनले बताए। राहत सामग्री संकलन भए पनि लक्षित प्रभावितसम्म पुग्न नसकेको उनको दाबी छ।
‘राहत सामग्रीहरू आर्मी क्याम्प र सभा हलमा थुप्रिएर बसेका छन्, तर पीडितले म्याट्रेस र ओढ्ने कपडासमेत पाएका छैनन्,’ केसीले भने।
विगतका भूकम्प र कोभिड महामारीमा जस्तै प्रमुख जिल्ला अधिकारीको नेतृत्वमा सर्वदलीय संयन्त्र बनाएर राहत वितरण गर्नुपर्ने र सुरक्षा निकायलाई उद्धारमा केन्द्रित गर्नुपर्ने उनले सुझाव दिए।
चिलिमे क्षेत्रको सुरुङमा नुवाकोटका एक इन्जिनियरसहित करिब दुई सय प्राविधिक तथा कामदार फसेको उल्लेख गर्दै केसीले उनीहरूको उद्धारमा ‘युद्धस्तर’मा काम हुन नसकेको बताए। चीनले उद्धारका लागि प्राविधिक सहयोगको प्रतिबद्धता जनाउँदा पनि सरकारले आवश्यक समन्वय गर्न नसकेको भन्दै उनले असन्तुष्टि जनाए।
प्रधानमन्त्री र गृहमन्त्रीको प्रभावित क्षेत्र भ्रमणप्रति टिप्पणी गर्दै उनले उच्चस्तरीय भ्रमण परिणाममुखी हुनुपर्ने बताए। ‘प्रधानमन्त्री गएर फर्किएपछि कुनै ठोस प्रगति देखिएको छैन। सरकार छ भन्ने अनुभूति जनताले गर्न पाएका छैनन्,’ उनले भने।
विपद्को समयमा कांग्रेसका नेता तथा कार्यकर्तालाई राजनीतिक प्रचार वा दलगत पहिचानभन्दा माथि उठेर मानवीय सेवामा जुट्न पनि केसीले आग्रह गरे।
