काठमाडौँ । रसुवामा आएको विनाशकारी आकस्मिक बाढीबाट प्रभावितमध्ये ७५ जना अझै विभिन्न अस्पतालमा उपचाररत छन् । स्वास्थ्य तथा खाद्य स्वच्छता मन्त्रालयका अनुसार बाढीपछि बिरामी तथा घाइते गरी २४२ जनालाई विभिन्न स्वास्थ्य संस्थामा भर्ना गरिएको थियो ।
स्वास्थ्य मन्त्रालयको स्वास्थ्य आपत्कालीन तथा विपद् व्यवस्थापन इकाईका अनुसार उपचाररतमध्ये १३५ जना उपचारपछि निको भएर घर फर्किएका छन् । बाढीका कारण हालसम्म तीन जनाको मृत्यु भएको पुष्टि भएको छ । मृतकमध्ये एक जनालाई अस्पताल पुर्याउँदा नै चिकित्सकले मृत घोषणा गरेका थिए ।
उपत्यकाबाहिरका तीन स्वास्थ्य संस्थामध्ये रसुवा जिल्ला अस्पताल धुन्चेमा सबैभन्दा बढी ७६ जना बिरामी भर्ना भएका थिए । तीमध्ये २७ जनालाई थप उपचारका लागि अन्य अस्पतालमा रिफर गरिएको छ भने ४८ जना डिस्चार्ज भइसकेका छन् ।
त्यस्तै, नुवाकोटस्थित त्रिशूली अस्पतालमा भर्ना भएका १८ जनामध्ये १४ जना उपचारपछि घर फर्किएका छन् । आयुर्वेद अस्पताल पिपलटारमा भर्ना भएका १६ जनामध्ये १४ जना अझै उपचाररत छन् । उपत्यकाबाहिरका स्वास्थ्य संस्थाबाट थप उपचार आवश्यक परेका २९ जना घाइतेलाई सुविधासम्पन्न अस्पतालमा रिफर गरिएको मन्त्रालयले जनाएको छ ।
काठमाडौँ उपत्यकाका १३ वटा प्रमुख अस्पतालमा समेत बाढी प्रभावितको उपचार भइरहेको छ । त्रिवि शिक्षण अस्पताल महाराजगन्जमा ५४ जना र राष्ट्रिय ट्रमा सेन्टरमा ४३ जना बिरामी भर्ना भएका छन् ।
यस्तै, वीर अस्पतालमा १५ जना, नेपाल एपीएफ अस्पताल बलम्बुमा ६ जना तथा नर्भिक, ग्रान्डी, ह्याम्स, ग्रिनसिटी, शुभम इन्टरनेश्नल हस्पिटल मनमैजु, मनमोहन मेमोरियल अस्पताल, परोपकार प्रसूति गृह, पाटन स्वास्थ्य विज्ञान प्रतिष्ठान र वीरेन्द्र अस्पतालमा समेत घाइतेहरूको उपचार भइरहेको मन्त्रालयले जनाएको छ।
