काठमाडौं – इलोन मस्कको भू–उपग्रहमा आधारित इन्टरनेट सेवा प्रदायक कम्पनी स्टारलिङ्कले नेपाल–तिब्बत सीमा क्षेत्रमा आएको विनाशकारी बाढीबाट प्रभावित क्षेत्रमा निःशुल्क इन्टरनेट सेवा उपलब्ध गराउने तयारी गरेको जनाएको छ।
कम्पनीले शनिबार सामाजिक सञ्जाल एक्समार्फत नेपालमा आएको विपद्प्रति दुःख व्यक्त गर्दै नेपाल सरकार तथा मानवीय उद्धार तथा राहतमा संलग्न निकायलाई सहयोग गर्न तयार रहेको जनाएको हो।
स्टारलिङ्कले अनुमति प्राप्त हुनेबित्तिकै आवश्यक उपकरण नेपाल पठाएर प्रभावित क्षेत्रमा निःशुल्क इन्टरनेट सेवा सञ्चालन गर्न सकिने बताएको छ।
कम्पनीले भनेको छ, “अनुमति प्राप्त हुनासाथ नेपाल सरकार र मानवीय साझेदारहरूलाई सहयोग गर्न स्टारलिङ्कका उपकरण पठाउन र निःशुल्क सेवा उपलब्ध गराउन हामी तयार छौँ।”
विपद्का बेला स्टारलिङ्क किन उपयोगी ?
बाढी तथा पहिरोका कारण सडक, पुल र मोबाइल नेटवर्कमा क्षति पुग्दा प्रभावित क्षेत्रमा सञ्चार सम्पर्क विच्छेद हुने गरेको छ। यस्तो अवस्थामा भू–उपग्रहमा आधारित स्टारलिङ्क इन्टरनेट सेवा उद्धार तथा राहत कार्यका लागि उपयोगी हुनसक्ने कम्पनीको भनाइ छ।
विशेषगरी बेपत्ताको खोजी तथा उद्धारमा खटिएका टोलीबीच समन्वय गर्न, घाइतेको उपचारमा संलग्न स्वास्थ्यकर्मी तथा मेडिकल टोलीलाई सञ्चार सुविधा उपलब्ध गराउन र सम्पर्कविहीन परिवारलाई आफ्ना आफन्तसँग जोडिन यो सेवा प्रभावकारी हुने कम्पनीले जनाएको छ।
केही मिनेटमै इन्टरनेट सञ्चालन
स्टारलिङ्कका अनुसार यसका उपकरण बक्सबाट निकालेर केही मिनेटमै जडान गरी इन्टरनेट सञ्चालन गर्न सकिन्छ। सेवा सञ्चालनका लागि मुख्यतः विद्युत् आपूर्ति र उपकरणले सिधै देख्ने खुला आकाश आवश्यक पर्छ।
यसका कारण भौतिक पूर्वाधारमा ठूलो क्षति पुगेका तथा परम्परागत सञ्चार सेवा अवरुद्ध भएका दुर्गम र विपद् प्रभावित क्षेत्रमा आपत्कालीन सञ्चारका लागि स्टारलिङ्क उपयोगी हुनसक्ने देखिन्छ।
