रसुवा । भोटेकोशी नदीमा बाढी आएको चार दिनपछि गोसाइँकुण्ड गाउँपालिका–२, टिमुरेमा माटोमा पुरिएकी सात वर्षीया बालिकाको जीवितै उद्धार गरिएको छ।
सशस्त्र प्रहरी बल नेपाल, २० नम्बर गुल्म धुन्चेबाट खटिएको टोलीले हिलाम्मे अवस्थामा रहेकी शिरगङ्गा इचाई मगरलाई आज दिउँसो उद्धार गरेको हो। गम्भीर घाइते अवस्थामा फेला परेकी उनलाई हेलिकप्टरमार्फत रसुवा जिल्ला अस्पताल धुन्चे पुर्याइएको थियो।
अस्पतालका वरिष्ठ सर्जन डा. सुनीलकुमार दासका अनुसार बालिकाको अवस्था गम्भीर रहेकाले थप उपचारका लागि शिक्षण अस्पताल महाराजगञ्ज रेफर गरिएको छ।
बालिकाकी आमा गीता इचाइ मगर र बुबा लोकबहादुर उचाइलाई पनि घटनास्थलबाट उद्धार गरी नेपाली सेनाको हेलिकप्टरमार्फत यसअघि नै थप उपचारका लागि काठमाडौं पठाइएको सशस्त्र प्रहरी निरीक्षक सोम गुरुङले जानकारी दिए।
चार दिनसम्म माटोमा पुरिएको अवस्थामा बालिका जीवितै भेटिनु उद्धार टोलीका लागि समेत महत्वपूर्ण उपलब्धि बनेको छ।
