काठमाडौं। सत्तारुढ राष्ट्रिय स्वतन्त्र पार्टी (रास्वपा)का सांसद डा. धनञ्जय रेग्मीले रसुवा–त्रिशूली करिडोरमा आएको भीषण बाढीबारे चीनले नेपाललाई समयमै पूर्वसूचना नदिएको भन्ने आरोप ‘मिथ्या’ र ‘र्युमर’ मात्र भएको बताएका छन् ।
शुक्रवार रेग्मीले हिमालय क्षेत्रमा हुने हिमपहिरो, चट्टान खस्ने र हिमताल फुट्नेजस्ता प्राकृतिक घटनाको ठ्याक्कै समय र स्थानबारे पूर्वानुमान गर्न कठिन हुने बताए । त्यसैले चीनसँग बाढीको पूर्वसूचना हुँदाहुँदै नेपाललाई नदिएको भन्ने आरोपको आधार नरहेको उनको भनाइ छ ।
‘चीनतर्फबाट सूचना आदानप्रदान नभएको भनेर आएका र्युमरहरू सबै र्युमर नै हो,’ उनले भने ।
रेग्मीले निरन्तर निगरानी हुने सगरमाथा क्षेत्रमा समेत हिमपहिरो तथा अन्य प्राकृतिक घटनाबाट पर्वतारोही र पथप्रदर्शकलाई सधैँ जोगाउन नसकिएको उदाहरण दिए । निगरानीको पहुँच नभएका हिमालयका अन्य क्षेत्रमा कुन ठाउँमा कहिले प्राकृतिक घटना हुन्छ भन्ने पूर्वसूचना दिन झन् कठिन हुने उनले बताए ।
प्राकृतिक विपद्को प्रकृति र पूर्वसूचनाको सीमाबारे विषयविज्ञको धारणा आवश्यक रहेको भन्दै उनले सञ्चारमाध्यमलाई पनि ग्ल्यासियोलोजी तथा सम्बन्धित विषयका विज्ञसँग मात्र यस्ता विषयमा धारणा लिन आग्रह गरे ।
रेग्मीले विगतका प्राकृतिक विपद्को उदाहरण दिँदै सबै घटनाको पूर्वसूचना सम्भव नहुने बताए । सेती फुट्ने कुरामा हामीलाई केही थाहा थियो त ?’ उनले प्रश्न गरे ।
चीनसँग बाढीसम्बन्धी सूचना भए पनि नेपाललाई समयमै नदिएको भन्ने अपुष्ट आरोपले दुई देशबीचको सुमधुर सम्बन्धमा असर पर्न सक्ने भन्दै उनले सामाजिक सञ्जालमा अफवाह नफैलाउन सबै पक्ष जिम्मेवार हुनुपर्ने बताए ।
