बुटवल। लुम्बिनी प्रदेशसभाको आठौँ अधिवेशनअन्तर्गतको बैठक सोमबार दिउँसो १ बजे बस्ने भएको छ। बैठकमा मुख्यमन्त्री चेतनारायण आचार्यले विश्वासको मत लिने कार्यसूची रहेको प्रदेशसभा सचिव दुर्लभकुमार पुन मगरले जानकारी दिएका छन्।
बैठकको सुरुवातमा सभामुखले प्रदेश प्रमुखबाट प्राप्त पत्रहरू प्रदेशसभामा पढेर सुनाउनेछन्। त्यसपछि मुख्यमन्त्री आचार्यले विश्वासको मत लिने प्रक्रिया अघि बढाइनेछ।
नेपाली कांग्रेसले नेकपा एमालेसँगको सत्ता सहकार्य तोड्दै आफ्ना मन्त्रीहरू सरकारबाट फिर्ता बोलाएपछि मुख्यमन्त्री आचार्यले विश्वासको मत लिन लागेका हुन्। केन्द्रमा विकसित नयाँ सत्ता समीकरणअनुसार लुम्बिनीमा एमालेसहितका दलहरूले आचार्य नेतृत्वको सरकारलाई समर्थन गर्ने तयारी गरेका छन्।
एमाले, नेकपा माओवादी केन्द्र, लोकतान्त्रिक समाजवादी पार्टी (लोसपा) र जनता समाजवादी पार्टी (जसपा)ले मुख्यमन्त्री आचार्यलाई विश्वासको मत दिने तयारी गरेका छन्। यी दलहरूको समर्थन कायम रहेकाले प्रदेशसभामा आचार्यले विश्वासको मत प्राप्त गर्ने सम्भावना बलियो देखिएको छ।
