काठमाडौं। कृषि विकास बैंक र टोखास्थित ग्रान्डी अन्तर्राष्ट्रिय अस्पतालबीच दुवै संस्थाका कर्मचारी तथा तिनका परिवारलाई स्वास्थ्य र बैंकिङ सेवामा विशेष छुट तथा सुविधा उपलब्ध गराउने सम्झौता भएको छ।
सम्झौतापत्रमा कृषि विकास बैंकका उपमहाप्रबन्धक सुशिल हुमागाईं र ग्रान्डीका प्रमुख सञ्चालन अधिकृत कर्णेल अमृत खन्नाले हस्ताक्षर गरेका छन्। कार्यक्रममा बैंकका विभागीय प्रमुख वीना शर्मा, वरिष्ठ शाखा प्रमुख ध्रुव पौडेल र व्यवसाय अधिकृत मणिराज ढुंगाना तथा अस्पतालका सहायक महाप्रबन्धक अर्चना प्रधान, वरिष्ठ अधिकृत मौलिका देउजा र अधिकृत माधव शर्मा उपस्थित थिए।
सम्झौताअनुसार ग्रान्डीले बैंकका बहालवाला र पूर्वकर्मचारी तथा तिनका आश्रित परिवारलाई स्वास्थ्योपचार, प्रयोगशाला परीक्षण, एक्स–रे, भिडियो एक्स–रे, बेड चार्ज, शल्यक्रिया र वेलनेस प्याकेजमा विशेष छुट दिनेछ। टेलिकन्सल्टेसन, सडक तथा हेलिकोप्टरमार्फत आपतकालीन उद्धार र स्वास्थ्य सचेतना कार्यक्रममा पनि प्राथमिकता तथा सहुलियत उपलब्ध हुनेछ।
त्यसैगरी, कृषि विकास बैंकले ग्रान्डीका चिकित्सक, नर्स, प्यारामेडिक्स र अन्य कर्मचारीलाई विभिन्न बैंकिङ सेवामा विशेष सुविधा दिनेछ। उनीहरूले बैंकका जुनसुकै शाखाबाट डिजिटल बैंकिङ, डेबिट तथा क्रेडिट कार्ड, लकर तथा घर, सवारी र शिक्षा कर्जालगायत सेवामा लाग्ने शुल्क र प्रिमियम दरमा विशेष छुट पाउनेछन्। वैदेशिक मुद्रा सटही र रेमिट्यान्स सेवामा पनि सहुलियत उपलब्ध हुनेछ।
दुवै संस्थाका कर्मचारीले आफ्नो संस्थाको आधिकारिक परिचयपत्र देखाएर सम्झौताअनुसारका सुविधा लिन सक्नेछन्।
सम्झौताले दुवै संस्थाबीचको सहकार्य विस्तारसँगै कर्मचारी कल्याण, सेवा आदानप्रदान र दीर्घकालीन व्यावसायिक सम्बन्धलाई थप सुदृढ बनाउने अपेक्षा गरिएको छ।
