काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकको वर्तमान परिस्थिति संवेदनशील रहेकाले अहिलेको मुख्य प्राथमिकता शान्ति–सुव्यवस्था र सामाजिक सद्भाव कायम गर्नु हुनुपर्ने बताएका छन्। उनले पछिल्लो घटनाक्रमबारे सत्यतथ्य बाहिर आउन समय लाग्ने भन्दै अनुसन्धान पूरा नहुँदै निष्कर्षमा पुग्न वा अफवाहको पछि नलाग्न आग्रह गरेका छन्।
बुधबार सिंहदरबारमा बसेको सर्वदलीय बैठकपछि सञ्चारकर्मीसँग कुरा गर्दै लामिछानेले विगतका आन्दोलन र अहिलेको परिस्थितिलाई एउटै रूपमा हेर्न नमिल्ने बताए। आन्दोलनका क्रममा नागरिकको ज्यान गएको घटनालाई गम्भीर रूपमा लिनुपर्ने उल्लेख गर्दै उनले त्यसबारे सुरक्षा निकाय जिम्मेवार र जवाफदेही हुनुपर्नेमा जोड दिए।
बैठकमा सहभागी राजनीतिक दलका शीर्ष नेताले पछिल्लो घटनाक्रमबारे सरकारको ध्यानाकर्षण गराएको जानकारी दिँदै लामिछानेले प्रधानमन्त्री र गृहमन्त्रीले आ–आफ्नो जिम्मेवारीअनुसार कार्यसम्पादन गरिरहेको बताए। अहिले राजनीतिक दलहरूबीच आरोप–प्रत्यारोपभन्दा पनि संयमता, संवाद र सहकार्य आवश्यक रहेको उनको भनाइ थियो।
“अनुसन्धानको निष्कर्ष नआएसम्म कुनैपनि विषयमा टिप्पणी गर्नु हतारो हुनेछ। अहिलेको प्राथमिकता भनेको शान्ति सुव्यवस्था र सद्भाव कायम गर्ने हो। कसले गल्ती गर्यो वा कसले कति बेला के बोल्यो भन्ने जस्ता ससाना विषयमा अल्झिने समय यो होइन,” लामिछानेले भने।
उनले विभिन्न भ्रम, अफवाह र षड्यन्त्रका कथन फैलिरहेको उल्लेख गर्दै त्यसको पछि नलाग्न आग्रह गरे। घटनाको निष्पक्ष अनुसन्धानका लागि सम्बन्धित निकायलाई सहयोग गर्नुपर्नेमा जोड दिँदै उनले तथ्य स्थापित हुनुअघि गरिने टिप्पणीले परिस्थिति थप जटिल बनाउन सक्ने बताए।
लामिछानेले सञ्चारमाध्यमलाई पनि सामाजिक सद्भावमा असर पर्ने गरी अपुष्ट सूचना प्रसारण नगर्न आग्रह गरे। जिम्मेवारीपूर्ण र तथ्यमा आधारित सूचना सम्प्रेषणमार्फत शान्ति र सामाजिक सद्भाव कायम राख्न सञ्चारमाध्यमको भूमिका महत्वपूर्ण रहने उनले बताए।
