काठमाडौँ । नेपाली काँग्रेसका पूर्वउपसभापति धनराज गुरुङले सर्वोच्च अदालतको निर्णय स्वीकार गर्दै पार्टीलाई एकताबद्ध रूपमा अघि बढाउनु नै उपयुक्त बाटो हुने बताएका छन्।
नेतृत्व तहमा देखिएका पछिल्ला राजनीतिक गतिविधिका बीच उनले पार्टी परित्याग गर्ने कुनै पनि कदम गलत हुने भन्दै त्यसतर्फ नजान नेता–कार्यकर्तालाई आग्रह गरेका छन्।
शेखर कोइराला निकट मानिने गुरुङले आफ्ना पक्षीय नेताहरूसँग छुट्टै छलफलसमेत गरेका थिए। पूर्वसभापति शेरबहादुर देउवा पक्षीय बैठकमा उनी सहभागी नभएको र कोइराला विराटनगरमा रहेकाले सो छलफलमा अनुपस्थित रहेको जनाइएको छ।
आफू निकट नेताहरूसँगको छलफलपछि उनले सर्वोच्च अदालतको निर्णयलाई स्वीकार गर्दै अगाडि बढ्ने निष्कर्षमा पुगेको जानकारी दिएका छन्। सामाजिक सञ्जालमार्फत केही नेताहरूले पार्टी परित्यागको घोषणा गरिरहेकोप्रति ध्यानाकर्षण भएको उल्लेख गर्दै उनले त्यसप्रति असहमति व्यक्त गरेका छन्।
गुरुङका अनुसार लामो समयको योगदान रहेको राजनीतिक दल छाड्नु व्यक्तिगत रूपमा गम्भीर भूल हुने भएकाले त्यस्तो कदम नचाल्न र पार्टी सुदृढीकरणमा ध्यान केन्द्रित गर्न उनले आग्रह गरेका छन्।
