सोलुखुम्बु । खुम्बु क्षेत्रमा लगातार बिग्रँदै गएको मौसमका कारण हरेक दिन उद्धारका लागि हेलिकोप्टर उडान गर्नु पर्ने अवस्था बनेको छ। आज बिहान पाइलट विवेकले लुक्लाबाट दुईपटक चार्टर उडान पूरा गरी लोबुचेका लागि तेस्रो उडान गरेका थिए। त्यहाँ उचाइमा बिरामी परेका दुई विदेशी पर्यटकको उद्धारका लागि उनी गएका थिए।
तर, खराब मौसम र कठिन दृश्यताबीच हेलिकोप्टर अवतरणका क्रममा समस्या उत्पन्न भयो। स्थानीय हेलिप्याडहरू हिउँले पूर्ण रूपमा ढाकिएका थिए भने घना बादलका कारण दृष्टि अत्यन्त कमजोर भएको बताइन्छ। अवतरणको बेला कुनै मार्सलर (संकेत दिने व्यक्ति) नभएको कारण पनि जोखिम थपिएको थियो।
हिउँमा अवतरणको क्रममा हेलिकोप्टरको सन्तुलन अचानक खलबलिँदा दुर्घटना हुने स्थिति बनेको थियो। “हिउँ कमजोर वा बाक्लो हुँदा यसको संरचनाले सन्तुलनमा असर गर्छ। मद्धे समयमा जहाज असन्तुलित भयो, त्यसपछि मैले तुरुन्त इन्धन बन्द गरेर ब्रेक तानेँ,” पाइलट विवेकले बताए। “त्यो क्षणिक निर्णयले आगलागी र ठुलो क्षति हुनबाट जोगायो।”
सौभाग्यवश, विवेक जहाजमा एक्लै थिए र उनलाई कुनै चोटपटक लागेको छैन। अहिले उनी लुक्लामा सुरक्षित रहेका छन् र केही बेरमा काठमाडौं फर्कने तयारीमा रहेको बताइएको छ।
स्थानीय प्रशासनले भने घटनाको विस्तृत विवरण संकलन भइरहेको र आवश्यक छानबिन अघि बढाइने जनाएको छ।
