
काठमाडौं, ६ कात्तिक । आफ्नै घरमा बालिकाहरू राखेर यौनधन्दा चलाएको आरोपमा प्रहरीले एक महिलालाई पक्राउ गरेको छ ।
पक्राउ पर्नेमा काठमाडौंको कागेश्वरी मनोहरा नगरपालिका-४ मुलपानी घर भएकी ४३ वर्षीय सीता गोतामे रहेकी छन् ।
नुवाकोटको तादी गाउँपालिका-३ बाट काठमाडौंमा घर बनाएर बसेकी गोतामेले गाउँघरमा आर्थिक अवस्था कमजोर भएका बालिकाहरूलाई घरायसी काममा लगाउने भन्दै यहाँ ल्याएर जबरजस्ती बेश्यावृतीमा संलग्न गराएको आरोप छ ।
उनलाई माचव बेचबिखन अनुसन्धान ब्युरोबाट खटिएको टोलीले असोज २ गते पक्राउ गरेर हिजो सार्वजनिक गरेको हो ।
व्युरोका प्रवक्ता प्रहरी उपरीक्षक (एसपी) गौतम मिश्रका अनुसार गौतामेको घरबाट चारजना बालिका तथा युवतीहरूको उद्दार गरिएको छ ।
एसपी गौतमका अनुसार ती महिलाले बालिकाहरूलाई घरमा भाडा माझ्ने र सरसफाइको काममा लगाउने भन्दै मासिक रु बीस हजार र खानबस्न दिने भन्दै ल्याउने गर्थिन्।
बालिकाहरूलाई घरबाट बाहिर निस्कन समेत नदिई आर्थिक प्रलोभनमा पारी ललाई फकाई गरी बालिकालाई बेश्याबृत्तिको काममा लगाएको खुल्न आएको व्युरोले जनाएको छ ।
बालिका तथा युवतीहरुलाई बेश्याबृत्तिको काममा लगाए बापत प्रति ग्राहक शारीरिक सम्पर्क राखेको एक देखि तीनहजार रुपैयाँसम्म सम्म लिई दैनिक चार/पाँच जना पुरुष ग्राहकसँग जबरजस्ती शारीरिक सम्पर्क राख्न बाध्य पारेको पाइएको छ ।
गौतामेले पुरुष ग्राहकहरु घरमा नै बोलाई यौनधन्दा चलाउने गरेको एसपी मिश्रले बताए ।
पक्राउ परेकी महिलालाई मानव वेचबिखन तथा ओसारपसार मुद्दामा काठमाण्डौ जिल्ला अदालतबाट म्याद थप गरेर आवश्यक अनुसन्धान भइरहेको प्रहरीले जनाएको छ ।