
राजविराज, २४ असोज । बडादशैंको अवसरमा सप्तरीको छिन्नमस्ता भगवती मन्दिरमा हेलिकप्टरबाट पुष्प वर्षा हुने भएको छ ।
छिन्नमस्ता गाउँपालिकाको आग्रहमा नेपाली सेनाको हेलिकप्टरमार्फत शुक्रवार पुष्पवृष्टि गर्न लागेको गाउँपालिका अध्यक्ष विद्यानन्द चौधरीले केटिएम दैनिकलाई बताए ।
‘धार्मिक आस्था र मातृशक्तिप्रति श्रद्धा व्यक्त गर्दै, छिन्नमस्ताको अद्भुत शक्तिको सम्मान स्वरूप हामीले अष्टमीको दिने पुष्प वर्षा गर्न लागेको हौँ,’ गाउँपालिका अध्यक्ष विद्यानन्द चौधरीले भने ।
शुक्रवार बिहान १० बजे पहिलो पटक नेपाली सेनाको हेलिकप्टरबाट मन्दिरको चारैतिर पुष्प वर्षा गरिने उनले जानकारी दिए ।
राजविराजदेखि १० किलोमिटर दक्षिणमा पर्ने छिन्नमस्ता गाउँपालिकास्थित ठूलोपोखरीको उत्तरी डिलमा रहेको छिन्नमस्ता प्रमुख ५१ शक्तिपीठमध्ये एक हो ।
अन्य बेलामा समेत भीड लाग्ने यस मन्दिरमा बडा दशैंको समयमा ठुलो उत्सव नै हुने गरेको पुजारी महानन्द ठाकुरले बताए । उनका अनुसार यस मन्दिरमा भाकल पूरा भएपछि लड्डु र बोका चढाउने परम्परा छ ।