कौशलटार (भक्तपुर), ३१ श्रावण । भक्तपुरको गठ्ठाघरमा ट्रकले स्कुटरलाई ठक्कर दिएर दुर्घटना भएको छ ।
केही समयअगाडि काठमाडौँबाट भक्तपुरतर्फ आइरहेको ना ६ प २१७३ नम्बरको ट्रकले सोही दिशाबाट आइरहेको बा. ४९ प ८९४४ नम्बरको स्कुटरलाई ठक्कर दिएको हो । प्रत्यक्षदर्शीका अनुसार दुर्घटनापश्चात् ट्रकले स्कुटर र त्यसका चालकलाई धेरै परसम्म सोहोरेर लगेको हो ।
स्कुटर चालक महिला भएको बुझिएको जिल्ला प्रहरी परिसर भक्तपुरका प्रवक्ता डिएसपी राजन कार्कीले केटिएम दैनिकलाई बताए ।
उनले भने, ‘ट्रकको चक्काबाट मृतकको शव निकाल्ने प्रयास जारी छ ।’
घटनास्थलमा सर्वसाधारणको भीड बढिरहेको हुनाले शव निकाल्न कठिनाइ भएको बुझिएको छ । थप जानकारी आउन बाँकी नै छ ।
सच्चाइएको : बिहीबार साँझ जिल्ला प्रहरी परिसर भक्तपुरले विज्ञप्ती जारी गर्दै निधन हुने व्यक्ति महिला नभएर ४०/४५ वर्षको जस्तो देखिने पुरुष रहेको जनाएको छ ।
