
काठमाडौं, ११ कात्तिक । गत असोज ११ गते मोटरसाइकल खरिद गर्ने वहानामा टेष्ट ड्राइभको निहुँमा मोटरसाइकल लिएर फरार भएका व्यक्ति झण्डै एक महिनापछि पक्राउ परेका छन् ।
पक्राउ पर्नेमा सिन्धुपाल्चोकको चौतारा साँगाचोकगढी नगरपालिका-२ घर भई हाल भक्तपुरको गठ्ठाघर बस्ने २३ वर्षीय समिर काफ्ले रहेका छन् ।
काठमाडौँको बाँसबारी स्थित गंगालाल अस्पताल नजिकबाट मोटरसाइकल खरिद गर्ने वहानामा टेष्ट ड्राइभका लागि बा ९५ प २१४ नम्बरको मोटरसाइकल लिएर काफ्ले गत असोज ११ गते फरार भएका थिए ।
बुढालिकण्ठ बस्ने अभिषेक श्रेष्ठले उक्त मोटरसाइकल खोजतलासका लागि काठमाडौँ उपत्यका ट्राफिक प्रहरी कार्यालय रामशाहपथमा दिएको निवेदनका आधारमा खोजी गर्ने क्रममा नम्बर परिवर्तन गरी बा ९८ प ६६६२ नम्बर राखेर चलाएको अवस्थामा काफ्ले बिहीबार भक्तपुरको गठ्ठाघरमा भेटिएका हुन् ।

काफ्लेलाई आवश्यक अनुसन्धानका लागि प्रहरी वृत्त महाराजगञ्ज पठाइएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी नायब उपरीक्षक रविन कार्कीले जानकारी दिए ।
सवारी साधन हराएमा ट्राफिक प्रहरीको हटलाईन नम्बर १०३, नेपाल प्रहरीको हटलाइन नम्बर १०० मा तत्कालै आफ्नो सवारी साधनको विवरण सहित फोन गर्न र नजिकैको प्रहरी कार्यालयमा निवेदन दिन सकिनेछ ।