काठमाडौं । सामाजिक सञ्जालबाट पुरुषहरूसँग मित्रता गाँस्दै उनीहरूलाई हनी ट्रयापमा पार्ने कार्यमा संलग्न भएको आरोपमा प्रहरीले एक युवतीसहित दुई जनालाई पक्राउ गरेको छ ।
उनीहरूले सामाजिक सञ्जालको माध्यमबाट युवतीको प्रयोग गरी पुरुषलाई खाजा खाने बाहानामा रेष्टुरेन्टमा लगि भेटघाट गर्ने गरेको अनुसन्धानको क्रममा खुलेको छ ।
त्यसपछि पीडितमाथि निगरानी राखेर घर ठेगाना, कार्यालय तथा सवारी साधनलगायतका सम्पूर्ण विवरणहरु लिने गर्दथे। त्यसपछि झुटा मुद्दा लगाएर फसाइदिने भन्दै पीडितलाई डर, धम्की तथा त्रास देखाइ मोलमोलाई गरेर ठूलो रकम माग गर्ने गरेका पाइएको छ।
काठमाडौं उपत्यका अपराध अनुसन्धान कार्यालयले ‘अपरेशन हनी ट्रयाप’ नाम दिएर गरिएको खोजतलासका क्रममा उक्त अपराधमा संलग्न रहेका दुई जनालाई पक्राउ गर्न सफल भएको हो ।
पक्राउ पर्नेमा सिन्धुलीको कमलामाई नगरपालिका-१३ घर भई हाल भक्तपुर बस्ने आयुष्मा भन्ने आसिका रजल मगर र दोलखाको भिमेश्वर-०५ घर भई हाल काठमाडौंको तारकेश्वर बस्ने राजु खत्री रहेको कार्यालयका प्रवक्ता समेत रहेका प्रहरी उपरीक्षक रविन्द्र रेग्मीले बताए ।
प्रहरीले उनीहरूको साथबाट ४० लाख बराबरको रकम उल्लेख भएका विभिन्न बैंकका ८ थान चेक समेत बरामद गरेको छ । उनीहरूलाई काठमाडौं उपत्यका विभिन्न स्थानबाट मंगलबार पक्राउ गरिएको हो ।
पक्राउ परेका दुवैलाई आपराधिक लाभ लिन नहुने कसुरमा थप अनुसन्धानको लागी जिल्ला प्रहरी परिसर, भक्तपुर पठाईएको एसपी रेग्मीले बताए ।
