सर्लाही । स्वास्थ्य तथा जनसंख्या मन्त्री मोहनबहादुर बस्नेतले सामुदायिक अस्पतालहरू पनि स्वास्थ्य मन्त्रालयकै सम्पत्ति भएको बताएका छन् ।
मङ्गलवार सर्लाहीको कौडेना गाउँपालिका फुलपरासीमा नवनिर्मित १५ शय्याको सामुदायिक अस्पतालको मङ्गलवार उदघाटन गर्दै मन्त्री बस्नेतले सम्पूर्ण नागरिकको स्वास्थ्य उपचारको जिम्मेवारी राज्यको भएकाले सामुदायिक अस्पतालहरू पनि राज्यकै सम्पत्ति भएको बताए ।
मन्त्री बस्नेतले भने, ‘यो अस्पताल कौडेना गाउँपालिकाको मात्र सम्पत्ति होइन, सर्लाही जिल्लाकै सम्पत्ति हो र स्वास्थ्य मन्त्रालयकै सम्पत्ति हो ।’ मन्त्री बस्नेतले सामुदायिक अस्पतालको विकास र बिस्तारका लागि स्वास्थ्य मन्त्रालयले सक्दो सहयोग गर्ने बताए ।
स्वास्थ्य तथा जनसंख्या मन्त्रालयको जिम्मेवारी सम्हालेपछि आफ्नो पहिलो प्राथमिकता विपन्न, गरिब एवं बेवारिसेले सर्वसुलभ उपचार पाउनु पर्ने भएकाले आफू त्यसमा लागेको र सफलता पाउँदै गइरहेको मन्त्री बस्नेतले दाबी गरे।
स्वास्थ्य मन्त्रालय मातहतका ९ वटा केन्द्रीय अस्पतालहरूलाई विपन्न बिरामीका लागि आफ्ना जनरल वार्ड निःशुल्क गर्ने निर्णय गराएर २ हजार २८ शय्यामा अहिले विपन्नहरूले सहज उपचार पाउन थालेको मन्त्री बस्नेतले जानकारी दिए ।
मन्त्री बस्नेतले दुई हप्ताभित्रै स्वास्थ्य मन्त्रालय मातहतका सङ्घीय अस्पतालहरूका सबै जनरल वार्ड निःशुल्क गरिने दाबी गरे । उद्घाटन समारोहमा खानेपानी तथा सरसफाइ मन्त्री महेन्द्रराय यादव, नेपाली काँग्रेसका जिल्ला सभापति सुरेन्द्रप्रसाद सिंह, कौडेना गाउँपालिकाका अध्यक्ष रुपेश यादव, प्रदेश सांसद लगायतका नेता कार्यकर्ता र सर्वसाधारणको उपस्थिति रहेको थियो ।
अस्पताल उद्घाटनका लागि मन्त्री बस्नेत मङ्गलवार सर्लाही पुगेका हुन् । फरक प्रसङ्गमा मन्त्री बस्नेतले नेपाली काँग्रेस र एमाले मिलेर सरकार बन्ने सम्भावना नरहेको दाबी गरे ।
एमालेसँग मिलेर सरकार बनाउँदा काउसो जस्तो हुँदो रहेछ भन्ने कुरा माओवादी, समाजवादीलाई मात्र नभएर मधेशीवादी पार्टीहरूले पनि थाहा पाइसकेकोले कुनै पनि पार्टी त्यो असफल प्रयासमा नलाग्ने उनको भनाई थियो ।
