काठमाडौँ । लामो समयदेखि नर्सिङ जनशक्तिको अभाव झेलिरहेको देशकै सबैभन्दा ठुलो र पुरानो वीर अस्पतालले सोमबारदेखि २४५ जना नयाँ नर्स पाएको छ ।
लोक सेवा आयोगको लिखित र अन्तरवार्ता उत्तीर्ण गरेर आएका २९५ जना नर्स मध्ये स्वास्थ्य तथा जनसङ्ख्या मन्त्रालयले २४५ जनालाई वीर अस्पतालमा पदस्थापन गरेको छ । बाँकी रहेका ५० जनालाई नेपाल सरकार मातहतका सङ्घीय अस्पतालमा खटाएको छ ।
यति ठुलो सङ्ख्यामा नर्सहरूलाई एकै पटक वीर अस्पतालमा पदस्थापन गरेको यो पहिलो पटक हो । नयाँ नियुक्त भएर वीरमा जान लागेका नर्सिङ जनशक्तिलाई स्वास्थ्य मन्त्रालयमा बोलाएर निर्देशन दिँदै स्वास्थ्य तथा जनसङ्ख्या मन्त्री मोहनबहादुर बस्नेतले मानवीय संवेदना जोडिएको क्षेत्र भएकाले नर्सिङ पेसा जागिर मात्र नभएको बताए।
सेवाका हिसाबले नर्सिङ जनशक्ति दोस्रो भगवान् नै भएको बताउँदै गरिब र विपन्न बिरामीको उपचारलाई सेवाको रूपमा लिएर अगाडि बढ्नु पर्नेमा मन्त्री बस्नेतले जोड दिए ।
नर्सिङ जनशक्तिलाई भविष्यमा उपयुक्त अवसर दिने काममा स्वास्थ्य मन्त्रालय पछि नपर्ने मन्त्री बस्नेतले बताए । मन्त्री बस्नेतको निर्देशनबाट अधिकांश नर्सहरू प्रोत्साहित भएका थिए ।
कार्यक्रममा स्वास्थ्य तथा जनसङ्ख्या मन्त्रालयका सचिव डा. रोशन पोखरेल, देवकुमारी गुरागाईँ लगायत अतिरिक्त सचिवहरू र मन्त्रालयका अधिकारीको उपस्थिति रहेको थियो ।
