काठमाडौँ । आज गण्डकी प्रदेशका तीन जिल्लामा भएका सडक दुर्घटनामा परेर चार जनाको निधन भएको छ ।
नेपाल प्रहरीको केन्द्रीय समाचार कक्षका अनुसार बागलुङमा दुई जना, कास्की र तनहुँमा एक/ एक जनाको ज्यान गएको हो ।
बागलुङको काठेखोला गाउँपालिका-५ ठुल्ढुङगामा ग.१ च ९४८५ नम्बरको जिप सडकबाट करिब ५ सय मिटर तल खसेर बुधवार बिहान दुर्घटना हुँदा २ जनाको घटनास्थलमै मृत्यु भएको छ ।
मृत्यु हुनेहरूमा गाडीमा सवार जैमिनी नगरपालिका-१० राङखानी घर भई हाल बागलुङ नगरपालिका-२ श्रीनगरटोल बस्ने ३७ वर्षीय दुर्गा पौडेल र गाडी चालक पर्वत जलजला गाउँपालिका-६ सालिजा घर भएका ३१ वर्षीय राजेन्द्र भन्ने रामचन्द्र पुन रहेका छन् ।
बागलुङको गलकोटबाट सामान बिक्री गरेर सदरमुकाम आउँदै गर्दा उक्त दुर्घटना भएको हो ।
त्यस्तै कास्कीको पोखरा महानगरपालिका-२५ हेम्जा चाक्ले कुनामा ध.१ ज ९५२ नम्बरको ट्याक्सीको ठक्करबाट सोही महानगरपालिका-२५ हेम्जा म्याग्दी चोक बस्ने मुस्ताङ घर भएकी १३ वर्षीया रेखा लामघारेको बुधवार बिहान मृत्यु भएको छ ।
ठक्करबाट गम्भीर घाइते भएका उनको फिस्टेल अस्पतालमा उपचारको क्रममा मृत्यु भएको हो । ट्याक्सी चालकलाई प्रहरीले नियन्त्रणमा लिएको छ ।
त्यसै गरी तनहुँको आँबुखैरेनी गाउँपालिका-२ एक्लेफाँटमा बा.७० प ९४७४ नम्बरको मोटरसाइकलले ना.६ ख ३०१६ नम्बरको ट्रकलाई ओभरटेक गर्ने क्रममा बुधवार बिहान दुर्घटना हुँदा मोटरसाइकलमा सवार लमजुङ सुन्दरबजार नगरपालिका-९ बस्ने ५८ वर्षीय चन्द्र बहादुर गुरुङको घटनास्थलमै मृत्यु भएको छ ।
साथै दुर्घटनामा घाइते भएका मोटरसाइकल चालकको आबुँखैरेनी अस्पताल तनहुँमा उपचार भइरहेको छ । ट्रक चालकलाई प्रहरीलाई नियन्त्रणमा लिएको छ ।