काठमाडौं । अमेरिका पठाइदिन्छु भन्दै एक व्यक्तिबाट रकम लिएर सम्पर्कविहीन भएकी महिललाई प्रहरीले पक्राउ गरेको छ ।
पक्राउ पर्नेमा उदयपुर चौदण्डीगढी नगरपालिका-७ वेलटार घर भई हाल ललितपुरको गोदावरी नगरपालिका-१४ बस्ने सुनिता न्यौपाने श्रेष्ठ रहेको काठमाडौं उपत्यकाका अपराध अनुसन्धान कार्यालयले जनाएको छ ।
उनले ओमनाथ मैनालीलाई बैदेशिक रोजगारको लागी अमेरिका पठाईदिन्छु त्यसको लागी एकतिस लाख रुपैयाँ लाग्ने र त्यहाँ पुगेपछि मोबाइल सफ्टवेयर कम्पनीमा मासिक साढे तीन लाख कमाई हुने जागिर लगाइदिने भन्दै प्रलोभनमा पारेकी थिइन् ।
श्रेष्ठले मैनालीबाट पटक पटक गरी छ लाख एक्काईस हजार रुपैयाँ लिएपछि सम्पर्कविहिन भएकी थिइन् ।
आफू ठगिएको थाहा पाएपछि मैनालीले बैदेशिक रोजगार विभागमा उजुरी दिएका थिए । विभागले उनलाई पक्राउ गरेर उपस्थित गराइदिन अनुरोध गरेपछि अपराध अनुसन्धान कार्यालयबाट खटिएको टोलीले शुक्रबार पुलचोकबाट श्रेष्ठलाई पक्राउ गरेको हो ।
उनलाई थप अनुसन्धान तथा कारवाहीको लागी बैदेशिक रोजगार विभाग ताहाचल, काठमाण्डौं पठाईएको कार्यालयका प्रवक्ता प्रहरी उपरीक्षक रविन्द्र रेग्मीले बताए ।
त्यस्तै माल्टा पठाईदिन्छु भन्दै दुई व्यक्तिबाट रकम लिएर फरार रहेका प्रविन खड्कालाई नियन्त्रणमा लिएको छ ।
मुगुको छाँयानाथ रारा नगरपालिका-३ ईमा घर भई हाल कलंकी बस्ने खड्काले कर्ण बहादुर बुढा समेत दुई जनालाई बैदेशिक रोजगारको लागी माल्टा पठाईदिन्छु भन्दै ठगी गरेका थिए ।
खड्काले त्यहाँ जानको लागि प्रतिव्यक्ती रु एघार लाख पचास हजार रुपैयाँ लाग्ने र माल्टा पुगेपछी प्रतिष्ठित कम्पनीमा मासिक एक लाख तलब हुने जागिर लगाइदिने भन्दै विश्वासमा पारेका थिए ।
खड्कालाई पीडितहरूले पटक पटक गरी रु नौ लाख रुपैयाँ दिएपछि उनी पीडितहरूबाट सम्पर्कविहीन भएका थिए ।
अपराध अनुसन्धान कार्यालयबाट खटिएको प्रहरी टोलीले खड्कालाई आज कुलेश्वरबाट पक्राउ गरी थप अनुसन्धान तथा कारवाहीको लागी बैदेशिक रोजगार विभाग ताहाचल काठमाण्डौं पठाएको जनाएको छ ।
