तुलसीपुर । दाङमा बहुउद्देश्यीय रङ्गशाला निर्माण भए पनि हस्तान्तरण हुन सकेका छैनन् ।
दाङ तुलसीपुर-१७ बेलझुण्डीस्थित रङ्गशाला निर्माण भएको तीन वर्ष हुँदा पनि हस्तान्तरण गरिएको छैन । एथ्लेटिक्स र फूटबल रङ्गशाला निर्माण भएको लामो समय भए पनि हस्तान्तरण हुन नसकेको जिल्ला खेलकूद विकास समितिका प्रमुख शान्ति सोमैले जानकारी दिइन्।
“रङ्गशाला निर्माण भएको २०७६ सालमा हो”, उनले भनिन्, “तर, किन हो, अझै हस्तान्तरण भएको छैन ।” अन्तर्राष्ट्रियस्तरको उक्त रङ्गशालामा आठौं राष्ट्रिय फूटबल तथा एथ्लेटिक्स प्रतियोगिता सम्पन्न भएका थिए ।
हस्तान्तरण नहुँदा आफूहरुलाई संरक्षणमा समस्या हुने गरेको उनको भनाइ छ । अहिले जसोतसो संरक्षण गरेको भए पनि पूर्ण अधिकार नहुँदा गाह्रो भएको उनको भनाइ छ । उक्त रङ्गशाला निर्माण गरेको ठेकेदारले कर्णालीमा हुने १० औं राष्ट्रिय खेलकूद प्रतियोगिताको रङ्गशाला निर्माण गरिरहेको छ ।
राष्ट्रिय खेलकूद परिषद् तथा प्रदेशस्तरको खेलकूद परिषद् कसले रङ्गशालाको संरक्षण र मातहतमा रहने विषय नटुङ्गिएपछि हस्तान्तरणमा समस्या भएको परिषद्का सदस्य सचिव टङ्कलाल घिसिङले जानकारी दिए। कानून अभावमा यस्तो समस्या देखिएको हो ।
रु २४ करोड २४ लाख लागतमा उक्त रङ्गशाला निर्माण भएको हो । दिवा एमए प्रतिष्ठा जेभीले भिआइपी प्याराफिटसहित रङ्गशाला निर्माण गरेको हो । रङ्गशालामा भिआइपी प्याराफिट, बाथरुम, बिजुली र रङरोगनसमेत गरिएको छ ।
रङ्गशालामा फूटबल मैदानका साथै सेन्थेटिक ट्रयाक पनि निर्माण गरिएको छ । जुन मोफसलमा पहिलो हो । त्यहाँ ‘भिआइपी’ प्याराफिटभित्र खेलाडीका लागि चेञ्जिङ रुम, अफिस, कन्फ्रेन्स हल, रेफ्रीका लागि छुट्टै कोठा निर्माण गरिएको छ ।
रङ्गशालाको पश्चिमतर्फ निर्माण गरिएको भिआइपी प्याराफिटमा चार सय १२ सिट छन् । रङ्गशालाको पूर्वी भागमा दर्शकका लागि साधारण प्याराफिट निर्माण गरिएको छ । भिआइपी प्याराफिटका लागि आवश्यक धातु तथा दर्शक बस्ने सिट मलेसियाबाट ल्याइएको हो ।
रङ्गशालामा प्रयोग गरिएका तारबारसमेत विदेशबाटै ल्याइएको हो । फिफा मापदण्डअनुसार निर्माण गरिएको फूटबल मैदानमा बरमुडा दुबो रोपिएको छ । यो दुबो भारतको कोलकताबाट ल्याएर रोपिएको हो ।
