काठमाडौं । गोरखादेखि बुटबलको जितगढीसम्म नेपाली सेनाले पदयात्रा सम्पन्न गरेको छ ।
नेपाली सेनाले अङ्ग्रेज फौजलाई परास्त गरेको बुटवलको जितगढी किल्लासम्म पुग्ने उद्देश्यले गोरखाबाट चैत २९ गते निस्केको टोलीले आज पदयात्रा सम्पन्न गरेको हो ।
एकीकरणमार्गसहित ऐतिहासिक धरोहरको जगेर्ना गर्ने, ऐतिहासिक एकीकरणको अभियानको सन्देशलाई भावी पुस्तामा हस्तान्तरण गर्ने र राष्ट्रिय एकताको भावना थप प्रगाढ बनाउने उद्देश्यले सरोकारवाला, स्थानीय निकायको सहभागितामा पदयात्रा कार्यक्रम सम्पन्न भएको जनसम्पर्क तथा सूचना निर्देशनालयले जनाएको छ ।
गोरखा दरबारबाट शुरु भएको पदयात्रामा सहभागी फौजले नेपालको राष्ट्रिय झन्डाको साथमा नेपाली सेनाको श्रीनाथ गण, कालिबक्स गण, बर्दवाणी गण, सबुज गण, पुरानो गोरख गण र जितगढी लडाइँमा सहभागी गुरुबक्स गुल्मको झन्डा बोकेर बाजागाजासहित पदयात्रा सुरु गरेका थिए ।
पदयात्रा समापन तथा जितगढी विजय उत्सव समारोहमा श्री मध्य पश्चिम पृतनापति र बुटवल उपमहानगरपालिका प्रमुखले नेपाल-अंग्रेज युद्धका बेला जितगढीको लडाइमा विजयी फौजको नेतृत्व गरेका कर्णेल उजिरसिंह थापाको शालिक अगाडी दीप प्रज्वलन गरी माल्यार्पण गरेका थिए । समापन समारोहमा स्थानीय झाँकी लगायत विविध कार्यक्रमहरु संचालन गरिएको थियो ।
पदयात्राको दौरान गोरखाबाट सहभागी फौजले तनहुँ जिल्लामा तैनाथ फौजलाई गोरखाको सतीघाटमा, तनहुँ जिल्लामा तैनाथ फौजले पाल्पा जिल्लामा तैनाथ फौजलाई तनहुँको केलादीघाटमा र पाल्पा जिल्लामा तैनाथ फौजले रुपन्देही जिल्लामा तैनाथ फौजलाई पाल्पाको नुवाकोटगढीमा झण्डाहरु हस्तान्तरण गरेका थिए ।
गोरखा दरबारदेखि जितगढीसम्म करिब २०७ कि.मि. दुरीमा सञ्चालित पदयात्रा नवौं दिनमा गोरखा, तनहुँ, स्याङ्जा, पाल्पा हुँदै रुपन्देहीको बुटवलस्थित जितगढीसम्म पुगेर समापन भएको हो ।