काठमाडौँ । वैदेशिक रोजगारीको लागि अमेरिका, जर्मनी, बेलायत तथा जापान लगायतका देशहरूमा पठाइदिन्छु भनी विभिन्न व्यक्तिहरूबाट करोडौँ रुपैयाँ ठगी गरेका एक व्यक्तिलाई प्रहरीले पक्राउ गरेको छ ।
यसरी पक्राउ पर्नेमा भक्तपुरको मध्यपुर ठिमी नगरपालिका-१ लोकन्थली बस्ने वर्ष ४४ को उज्वल खड्का रहेका छन् ।
खड्काले सुनिला गुरुङ समेत २० जनालाई वैदेशिक रोजगारीको लागि अमेरिका, जर्मनी, बेलायत तथा जापानमा जानको लागि प्रतिव्यक्ति ३० लाख रुपैयाँ लाग्छ र त्यहाँ पुगेपछि मासिक चार लाख तलब हुने प्रतिष्ठित कम्पनीहरूमा काम लगाइदिन्छु भनेर प्रलोभनमा परेका थिए ।
उनले ती व्यक्तिहरूबाट पटक पटक गरी तीन करोड ५६ लाख आठ हजार रुपैयाँ रकम लिएर सम्पर्कविहीन भएका थिए ।
आफू ठगिएको थाहा पाएपछि पीडित व्यक्तिहरूले वैदेशिक रोजगार विभागमा उजुरी दिएका थिए । विभागको अनुरोधमा काठमाडौँ उपत्यका अपराध अनुसन्धान कार्यालय, मिनभवनले खड्कालाई मङ्गलवार बेलुका रौतहटको चन्द्रपुर नगरपालिका-४ चपुरबाट पक्राउ गरेको हो ।
उनलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर, काठमाडौँ पठाइएको कार्यालयका प्रवक्ता प्रहरी उपरीक्षक सोमेन्द्र सिंह राठौरले बताए ।
पोर्चुगल पठाइदिने भन्दै ठगी गर्ने पक्राउ
प्रहरीले वैदेशिक रोजगारीको लागि पोर्चुगल पठाइदिन्छु भन्दै १० जना ठगी गरेको आरोपमा अर्का एक जनालाई मङ्गलवारै पक्राउ गरेको छ । यसरी पक्राउ पर्नेमा सिन्धुपाल्चोक लिसंखुपाखर गा.पा. वडा नं. ६ पाखरटोल स्थायी घर भई हाल नयाँ बानेश्वर, काठमाडौँ बस्ने वर्ष २३ को टिका बहादुर भण्डारी रहेका छन् ।
भण्डारीले मिलन तामाङ सहित १० जना पोर्चुगल पठाइदिन्छु भन्दै उनीहरूबाट १५ लाख रुपैयाँ ठगी गरेर सम्पर्क विहीन भएका थिए । अपराध अनुसन्धान कार्यालयबाट खटिएको टोलीले उनलाई मङ्गलवार बेलुका ताहाचलबाट पक्राउ गरेर वैदेशिक रोजगार विभागमा बुझाएको छ ।
भुटानी शरणार्थी बनाइ अमेरिका लैजाने गिरोहविरुद्ध थप १० पीडितले दिए उजुरी
नेपालमा रहेका नेपालीहरूलाई भुटानी शरणार्थी बनाएर अमेरिका लैजानै भन्दै ठगी गर्ने गिरोहविरुद्ध थप १० जना पीडितहरूले उजुरी दिएका छन् ।
काठमाडौँमा बस्ने सन्देश शर्मा, सानु भण्डारी, केशव दुलाल समेतको मिलेमतोमा २०७७ सालदेखि हालसम्म आफूहरूबाट पाँच करोड १९ लाख ९७ हजार बढी ठगी गरेको भन्दै पीडितहरूले काठमाडौँ उपत्यका अपराध अनुसन्धान कार्यालयमा लिखित जाहेरी दिएका हुन् ।
यसरी जाहेरी दिने व्यक्तिहरू कास्की, दाङ, मोरङ, रुकुम लगायतका जिल्लाका बासिन्दा रहेको प्रहरी उपरीक्षक सोमेन्द्र सिंह राठौरले बताए ।
