काठमाडौं । २२ जना युवायुवतीलाई वैदेशिक रोजगारीको लागि ईटाली, दक्षिण कोरिया, न्युजिल्याण्ड तथा पोर्चुगल लगायतको देशहरूमा पठाईदिन्छु भनेर रकम लिइ ठगी गरेको आरोपमा प्रहरीले दुई जनालाई पक्राउ गरेको छ ।
उनीहरूले ती व्यक्तिबाट प्रतिव्यक्ति रु पाँच लाख लाग्ने र त्यहाँ पुगेपछि मासिक एक लाख कमाई हुने प्रतिष्ठित कम्पनीमा काम लगाइदिने भन्दै पटक पटक रकम लिएका थिए ।
पटक पटक गरी ६६ लाख ३७ हजार भन्दा बढी रकम लिइसकेपछि पनि विदेश नपठाएर लापत्ता भएपछि पीडितहरूले काठमाडौं उपत्यका अपराध अनुसन्धान कार्यालय, मिनभवनमा लिखित जाहेरी दिएका थिए ।
वैदेशिक रोजगारीमा विदेश पठाउने प्रलोभनमा पारेर रकम लिएर ठगी गरेको आरोपमा कालीकोटकमो सान्नी त्रिवेणी गाउँपालिका-५ स्थायी घर भई हाल काठमाडौंको गोगंबु बस्ने वर्ष २८ को सुधन कुमार शाही र सोलुखुम्बुको सोलु दुधकुण्ड नगरपालिका-१ स्थाई घर भई हाल टोखा नगरपालिका बस्ने वर्ष ३१ को अनिल श्रेष्ठलाई पक्राउ गरेको छ ।
पक्राउ परेका मध्ये शाही टाउनप्लानिङमा रहेको ग्रीनलीफ इन्टरनेशल कन्सलटेन्सी र ठमेलमा रहेको नेपाल स्नोफल माउन्टेन ट्रेक एण्ड एक्पिडिसन नामक कम्पनीको सञ्चालक र श्रेष्ठ ती दुवै कम्पनीको म्यानेजिङ डाइरेक्टर रहेको खुलेको अपराध अनुसन्धान कार्यालयका प्रवक्ता प्रहरी उपरीक्षक रविन्द्र रेग्मीले बताए ।
गत चैत ३० गते दुवैबाट सिनामंगलबाट पक्राउ गरेर थप अनुसन्धान तथा कारवाहीको लागि जिल्ला प्रहरी परिसर टेकु, काठमाडौ पठाइएको एसपी रेग्मीले बताए ।