पोखरा । २०७० सालमा पोखरामा धारिलो हतियार प्रयोग गरेर एक व्यक्तिको हत्या गरी फरार भएका व्यक्ति अहिले जेल चलान भएका छन् ।
घटना २०७० साल पुष १३ गते राती साढे ९ बजेको हो । कास्कीको साविक सार्दीखोला गा.वि.स. वडा नं.८ बस्ने भिम बहादुर मगरलाई धारिलो हतियार (चक्कु) प्रयोग गरी अनुहार तथा शरीरको विभिन्न भागमा प्रहार गरी हत्या गरेकोमा अदालतबाट जन्मकैद ठहर भएका व्यक्ति अहिले पक्राउ परेका छन् ।
यसरी पक्राउ पर्नेमा म्याग्दी स्थायी घर भई हाल जिल्ला कास्की माछापुच्छ्रे गाउँपालिका-२ भराभरी बस्ने वर्ष ३७ को जयन्द्र पाईजा पुन रहेका हुन् ।
घटनापछि फरार रहेका पुनलाई वडा प्रहरी कार्यालय बगरबाट खटिएको प्रहरी टोलीले चैत २९ गते पक्राउ गरेको हो ।
पक्राउ परेका पुनलाई जन्मकैदको फैसलाअनुसार कैद भुक्तानको लागि कारागार पठाइएको जिल्ला प्रहरी कार्यालय कास्कीका प्रवक्ता प्रहरी नायव उपरीक्षक श्रवण कुमार बि.क. ले बताए ।