काठमाडौं । सयौं व्यक्तिहरूलाई अमेरिका, कोरिया तथा पठाईदिन्छु भन्दौ करोडौं रकम ठगी गरेको आरोपमा प्रहरीले दुई जनालाई पक्राउ गरेको छ ।
अमेरिका र कोरिया पठाइदिन्छु भनेर ठगी गर्नेमा काठमाडौं महानगर-१४ स्थाई घर भई हाल बुढानिलकण्ठ नगरपालिका- कपन बस्ने वर्ष ४२ को पवन राणा रहेका छन् ।
उनले वैदेशिक रोजगारीको लागि सहजै अमेरिका तथा दक्षिण कोरिया पठाईदिन सक्छु भनी सयौँ व्यक्तिहरूबाट करोडौँ रकम लिई सम्पर्क विहीन भएको भन्दै वैदेशिक रोजगार विभागमा उजुरी परेको थियो ।
विभागमा उजुरी परेपछि विभागले काठमाडौँ उपत्यका अपराध अनुसन्धान कार्यालय, मिनभवनलाई पत्र लेख्दै राणालाई उपस्थित गराइदिनु भनेपछि प्रहरीले उनलाई पक्राउ गरेको हो ।
उनलाई मंगलबार कपनबाट पक्राउ गरी थप अनुसन्धान तथा कारवाहीको लागि वैदेशिक रोजगार विभाग बुद्धनगर, काठमाडौँ पठाईएको उपत्यका अपराध अनुसन्धान कार्यालयका प्रवक्ता प्रहरी उपरीक्षक सोमेन्द्र सिंह राठौरले केटिएम दैनिकलाई बताए ।
त्यस्तै प्रहरीले जिटुजी सम्झौता मार्फत् ईजरायल पठाईदिन्छु भनी रकम ठगी गर्ने व्यक्तिलाई समेत पक्राउ गरेको छ । पक्राउ पर्नेमा बर्दियाको गुलरिया नगरपालिका-३ खैरापुर टोल स्थाई घर भई हाललाजिम्पाट बस्ने वर्ष २६ को सुनिल कुमार यादव रहेका छन् ।
यादवले रिता लामा समेत दुई जनालाई वैदेशिक रोजगारीको लागि नेपाल सरकार र ईजरायल बीच हुने जिटुजी सम्झौता मार्फत् सरकारी कोटामा ईजरायल जानको लागि प्रतिव्यक्ति रु. १८ लाख रकम लाग्ने भन्दै उनीहरूबाट ३१ लाख रुपैयाँ लिएका थिए ।
पीडितहरूलाई ईजरायलमा पुगेपछि एग्रिकल्चर कम्पनीमा काम लगाइदिन्छु मासिक तलब एक लाख ९० हजार हुने भनेर विश्वासमा दिलाएर पटकपटक गरी जम्मा रु ३१ लाख लिएर फरार भएका थिए ।
उनलाई पनि मंगलबारै लाजिम्पाटबाट पक्राउ गरिएको प्रहरी उपरीक्षक राठौरले बताए ।
