काठमाडौं । वैदेशिक रोजगारीमा गएकाहरु मृत्यु भएपछि पाउने बीमा वापतको रकममा ठगी गरेको प्रकरणमा थप दुई जनालाई प्रहरीले पक्राउ गरेको छ।
पक्राउ पर्नेहरुमा अर्घाखाँचीको छत्रदेव गाउँपालिका–४ घर भई वैदेशिक रोजगार बोर्डमा नासु पदमा कार्यरत कम्युटर अपरेटर ३६ वर्षीय पशुपति अधिकारी र भक्तपुरको चागुँनारायण नगरपालिका–४ बुढाथोकी गाउँबस्ने सूर्यज्योति जीवन बीमा कम्पनीका जुनियर अधिकृत ३० वर्षीय उमेश बुढाथोकी छन्।
काठमाडौं उपत्यका अपराध अनुसन्धानको कार्यालयले अधिकारीलाई शुक्रबार र बुढाथोकीलाई शनिबार भक्तपुरको कमलविनायकबाट पक्राउ गरेको हो। यसअघि चैत २३ गते यही प्रकरणमा प्रहरीले ६ जनालाई पक्राउ गरेको थियो।
पक्राउ परेका उनीहरुले विदेशमा मृत्यु भएकाहरुको परिवारले पाउने बीमा रकमबाट पाउने १३-१४ लाख रुपैयाँ मध्येबाट ७-८ लाख रुपैयाँ ठगी गरेको खुलेको थियो। विदेशमै मृत्यु भएको खण्डमा परिवारले १४ लाख पाउने प्रावधान छ भने छुट्टीमा नेपाल आउँदा मृत्यु भएकाको परिवारले १३ लाख पाउने गरेका छन्।
विदेशमा मात्र नभई नेपालमा मृत्यु भएका व्यक्तिहरुको बीमा रकमबाट समेत ठगी गरेको पाइएको छ।
