काठमाडौं । नेपाली सेनाको साइबर स्पेशमा अनधिकृत पहुँच पुर्याउने उद्देश्यले विभिन्न समयमा साइवर हमला गर्ने एक युवालाई प्रहरीले पक्राउ गरेको छ ।
नेपाली सेनाले साइबर ब्युरोमा यस विषयमा आवश्यक अनुसन्धान तथा कारबाही गर्न अनुरोध गरेसँगै प्रहरीको अनुसन्धान, प्राविधिक विश्लेषण तथा ह्युमन इन्टेलिजेन्सका आधारमा उक्त कार्यमा संलग्न एक युवा पक्राउ परेका हुन् ।
पक्राउ पर्नेमा स्याङ्जाको वालिङ्ग नगरपालिका-१० घर भई हाल पोखरा महानगरपालिका-१६ बाटुलेचौर बस्ने वर्ष २१ को सागर ढकाल रहेको ब्यूरोका प्रवक्ता प्रहरी उपरीक्षक पशुपति कुमार रायले केटिएम दैनिकलाई बताए ।
ढकाल आफू डेरामा बसेको घर धनीको ईन्टरनेट प्रयोग गरेर नेपाली सेनाको साइबर स्पेसमा अनधिकृत पहुँच पुर्याउन खोजेको देखिएको छ ।
ब्यूरोबाट खटिई गएको टोलीले बिहीबार ढकाललाई पोखराबाट पक्राउ गरी विद्युतीय कारोबार ऐन २०६३, अपराध अन्तर्गतको कसुरमा काठमाडौं जिल्ला अदालतबाट आजका मितिले सात दिनसम्म म्याद थप गरी अनुसन्धान गरिरहेको एसपी रायले बताए ।