काठमाडौं । काठमाडौं उपत्यकाका विभिन्न स्थानबाट अमेरिकी डलर साटिदिन्छु भन्दै विभिन्न व्यक्तिबाट ३० लाख पचास हजार नगद रुपैयाँ ठगी गरेको आरोपमा एक युवक पक्राउ परेका छन् ।
यसरी पक्राउ पर्नेमा सिन्धपाल्चोक बाह्रबिसे नगरपालिका-२ कर्थली घर भई भक्तपुरको बालकोट बस्ने वर्ष २८ को भिम बहादुर तामाङ हुन् ।
उनलाई काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले बधुबार बेलुका बालकोट बसपार्कबाट पक्राउ गरेको हो ।
तामाङले भक्तपुर दधिकोटमा एक व्यक्तिबाट नगद १९ लाख, बालकोट बस्ने एक व्यक्तिबाट पाँच लाख पचास हजार, ललितपुरको चाँगाथलीबस्ने एक व्यक्तिबाट दुई लाख, ललितपुरको सानोगाउँ बस्ने व्यक्तिबाट चार लाख ठगी गरेको खुलेको छ ।
पक्राउ परेका व्यक्तिलाई थप अनुसन्धान तथा कारबाहीको लागि प्रहरी वृत सातदोबाटो पठाईएको एसपी सोमेन्द्र सिंह राठौरले बताए ।
तामाङले २०७७ असोज २५ गते सिन्धुपाल्चोकको सुनकोशी गाउँपालिका-७ मा विक्रम गिरीलाई नक्कलि सुन देखाई रु पाँच लाख ठगी गरेको र २०७८ श्रावणमा ११ गते उनले काठमाडौको नयाँ बानेश्वरमा एक व्यक्तिलाई नक्कलि सुन देखाई ठगी गरेको समेत खुलेको छ ।
तामाङले अहिले डलर साटिदिने भन्दै विभिन्न व्यक्तिहरूबाट ठगी गरेर प्राप्त गरेको रकमले ऋण तिरेको र मोटरसाइकल खरिद गरेको अनुसन्धानको क्रममा खुलेको एसपी राठौरले बताए ।