काठमाडौँ । दाइजो नल्याएको भन्दै बुहारीलाई शारीरिक र मानसिक यातना दिएको आरोपमा ससुरा पक्राउ परेका छन् । महोत्तरीको औरही नगरपालिका बस्ने उनकी बुहारी नेहा चौधरीले दिएको किटानी जाहेरीका आधारमा ससुरा राम प्रवेश चौधरी पक्राउ परेका हुन् ।
२० असोज २०७९ मा दाइजो नल्याएको भन्दै श्रीमान् पंकज चौधरी र ससुरा राम प्रवेश चौधरीले घरमा नै बस्न नदिएको भन्दै उनी विरुद्ध नेहा चौधरीले मुद्दा हालेकी थिइन् । त्यस लगत्तै श्रीमान् पंकजलाई भने अदालतको आदेश बमोजिम प्रहरीले पक्राउ गरी पुर्पक्षको लागि जेल चलान गरिसकेको छ ।
तर पंकजका बुबा राम प्रवेश फरार भएका थिए । मनरासिस्वा नगरपालिकाको कट्टी गाउँस्थित दशगजा नजिकै लुकिछिपी बसिरहेको वेला पक्राउ गरिएको प्रहरीले जनाएको छ ।
तीन वर्षको प्रेम पश्चात् २५ फागुन २०७८ मा नेहा र पंकजबीच सामाजिक परम्परा अनुसार जनकपुरधामको राजदरबार होटेलमा विवाह सम्पन्न भएको थियो । विवाहको चार महिनापछि दुवैबीच दरार उत्पन्न भएको थियो ।
नेहाले दाइजोमा पंकजले काठमाडौँमा घर किनिदिन भन्दै आफूलाई यातना दिइरहेको आरोप लगाउँदै आएकी छिन् । पंकजले भने आफूमाथि लगाएको आरोप निधार रहेको दाबी गर्दै आएका छन् । उनले आफू विवाह गर्न नमान्दा पनि विवाह गर्न बाध्य पारेको बताउने गरेका छन् ।
नेहाले श्रीमान् पंकज र परिवारका सदस्य विरुद्ध बकसपत्र बदर, जालसाजी, घरेलु हिंसा, दाइजो, माना चामल र अंश मुद्दा दायर गरेकी छन् भने पंकजले सम्बन्ध विच्छेदको मुद्दा दायर गरेका छन् ।
श्रीमान् पंकज र उनका बुबा राम प्रवेशलाइ अदालतले पुर्पक्षको लागी जेल चलान गर्ने आदेश दिए लगत्तै पंकज पक्राउ परेता पनि राम प्रवेश भने फरार नै थिए । प्रहरीको खोजीको क्रममा रहेका राम प्रवेश दशगजा क्षेत्रमा लुकेर बसेको सूचनाका आधारमा पक्राउ गरिएको प्रहरी उपरीक्षक प्रकाश मल्लले जानकारी दिए ।
छोरा पंकजलाइ जस्तै उनलाई पनि सोही प्रकृतिको कसुरमा कारबाही प्रक्रिया अगाडि बढाइने जिल्ला प्रहरी कार्यालय महोत्तरीले जनाएको छ ।
र यो पनि
