सप्तरी । जिल्लाको रुपनी गाउँपालिकाकी एक महिलाले एकै पटकमा तीन जना सन्तानलाई जन्म दिएकी छन् ।
उक्त गाउँपालिका- १ रायपुर बस्ने ओमरामकी श्रीमती सरस्वती रामले एकै पटक तीन सन्तानलाई जन्म दिएकी हुन् । उनले वी.पी. कोइराला स्वास्थ्य विज्ञान प्रतिष्ठान धरानमा मंगलबार दिउँसो दुई जना छोरा र एक जना छोरीलाई जन्म दिएकी स्थानीय सन्तोष यादवले बताएका छन्। दुई छोराको तौल क्रमशः १ किलो ६६० ग्राम र १ किलो ४८० ग्राम रहेको छ भने छोरीको तौल १ किलो ६६१ किलोग्राम रहेको छ ।
सुत्केरी व्यथा लागेपछि उनलाई धरान लगिएको थियो । उनले पहिलो पटक बच्चा जन्माउँदा तीन सन्तान जन्मिएका हुन्। सरस्वतीकाे आर्थिक अवस्था कमजोर भएका कारण बच्चाको पालनपोषणमा समस्या हुने भएकाले सहयोग गरिदिन यादवले सामाजिक सञ्जालमार्फत अपील समेत गरेका छन् ।
यसअगाडी नेपालमा तिम्लिया मात्र होइन एक महिलाले ४ सन्तानसमेत जन्माएका उदाहरणहरु छन् । २०७७ बैशाख १० गते वीरगञ्जको एक अस्पतालमा २० वर्षीया युवतीले ४ सन्तानको जन्म दिएकी थिइन् । पर्साको छिपहरमाइ गाउँपालिका- ४ जयमंगलापुरका सलीम गद्धीकी श्रीमती २० वर्षीया नजमा खातुनले ३ छोरी र १ छोरा गरी चारजना शिशुलाई जन्म दिएकी थिइन् ।
त्यस्तै ८ असोज २०७६ मा काठमाडौं मेडिकल कलेजमा धनगढीका पदमबहादुर शाहीकी श्रीमती खगित्रा शाहीले एकैसाथ चार सन्तानको जन्म दिएकी थिइन् । एक छोरी र तीन छोरा पालैपालो शल्यक्रिया गरेर निकालिएको थियो ।
२०७७ साल भदौ ११ गते काठमाडौंको कान्तिपथमा रहेको ग्रान्डी सिटी अस्पतालमा एक महिलाले तीन सन्तानको जन्म दिएकी थिइन् ।
