काठमाडौँ । वैदेशिक रोजगारको सिलसिलामा मलेसियामा रहेका एक नेपाली युवाले त्यहाँबाट महिलाको चरित्र हत्या गरेपछि विमानस्थलबाटै पक्राउ परेका छन् ।
सामाजिक सञ्जालको माध्यमबाट महिलाको चरित्रहत्या हुने काम गरेको अभियोगमा रौतहट देवाही गोनही नगरपालिका-५ टिकुलिया घर भएका २२ वर्षीय हरिहर प्रसाद यादवलाई बिहीबार प्रहरीले त्रिभुवन अन्तर्राष्ट्रिय विमानस्थलबाट पक्राउ गरेको हो ।
यादवले पीडित महिलाको बहिनीको समेत तस्बिर प्रयोग गरी सामाजिक सञ्जालमा चरित्रहत्या हुने अश्लील शब्दहरू लेख्दै पीडितका परिवारलाई मानसिक तनाव, दुःख हैरानी दिने गरेको साइबर ब्युरोका प्रवक्ता एसपी पशुपति कुमार रायले बताए ।
प्रवक्ता रायका अनुसार मलेसियाबाट नेपाल फर्किने क्रममा त्रिभुवन अन्तर्राष्ट्रिय विमानस्थल गौचरबाट उनलाई पक्राउ गरिएको हो ।
विमानस्थलबाट पक्राउ परेका यादवविरुद्ध जिल्ला अदालत काठमाडौँबाट बिहीबारदेखि ५ दिन म्याद थप अनुसन्धान भइरहेको साइबर ब्युरोले जारी गरेको विज्ञप्तिमा उल्लेख छ ।
