एक नाबालिकलाई जबरजस्ती करणी गरेको मुद्दामा नेपाली क्रिकेट टोलीका निलम्बित कप्तान सन्दीप लामिछाने आज दुई देखि तीन बजेसम्ममा छुट्ने भएका छन् ।
सन्दीपको तर्फबाट मुद्दा लडेका कानुन व्यवसायी सरोज कृष्ण घिमिरेले आज सुन्धारा कारागारमा सन्दीप लामिछानेसँग भेट गरेर फर्किएपछि सञ्चारकर्मीसँग कुरा गर्दै लामिछाने दिउँसो दुई देखि तीन बजेसम्म छुट्ने बताए ।
उनले भने, सन्दीपको परिवार धरौटीको रकमको व्यवस्थामा लाग्नुभएको छ । यहाँबाट छुटेपछि जिल्ला अदालत काठमाडौंमा तारेख लिनुपर्ने हुन्छ । यी सबै कुराहरू सक्दा दुई देखि तीन बजेभित्रमा उनी रिहा हुनेछन्।”
२० लाख धरौटी रकम जिल्ला अदालत काठमाडौंमा बुझाएपछि र सो रकम बुझाएको रसिद कारगारमा पेश गरेपछि लामिछानेको स्वास्थ्य परीक्षण गरेर जिल्ला अदालत लगिने त्यहाँबाट तारेख लिएपछि उनी रिहा हुने कानुन व्यवसायी घिमिरेले बताए ।
लामिछाने कारागारबाट रिहा भएतापनि उनको नाममा जारी भएको पासपोर्ट रोक्का हुने भएकाले उनी विदेश जान पाउने छैनन् भने काठमाडौं उपत्यका बाहिर जादाँ पनि प्रहरीलाई लिखित जानकारी गराउनुपर्ने हुन्छ ।
