३०१ औं पृथ्वी जयन्ती तथा राष्ट्रिय एकता दिवसको अवसरमा गोरखा दरबारबाट सुरु भएको एकीकरण मार्ग पदयात्रा सकिएको छ ।
२१ गते गोरखा दरवारबाट सुरु भएको एकीकरण मार्ग पदयात्रा कार्यक्रम नेपाल एकीकरणको समयमा विजय अभियानको लागि प्रयोग भएका पदमार्ग गोरखा, धादिङ्ग, नुवाकोट हुंदै हिजो (मंगलबार) काठमाण्डौस्थित हनुमान ढोकासम्म आएर समापन भएको सैनिक जनसम्पर्क तथा सूचना निर्देशनालयले जनाएको छ ।
हनुमानढोका दरबारमा आयोजित विशेष समारोहमा उक्त कार्यक्रममा सहभागी फौजले गोरखाबाट बोकेर ल्याएको नेपाली सेनाका आरम्भकालीन पाँच कम्पनीको झण्डा, नेपालको राष्ट्रिय झण्डा, टर्चलाइट तथा दिपज्योती हस्तान्तरण गरेको थियो ।
गोरखाबाट सुरु भएको पदयात्रा टोलीले धादिङ्ग जिल्लामा तैनाथ फौजलाई हस्तान्तरण गरेको थियो भने, धादिङ्ग जिल्लामा तैनाथ फौजले नुवाकोट जिल्लामा तैनाथ फौजलाई, नुवाकोट जिल्लामा तैनाथ फौजले काठमाण्डौंस्थित नागार्जुनमा तैनाथ फौजलाई र नागार्जुनमा तैनाथ फौजले हिजो हनुमानढोकामा तैनाथ शार्दुलजंग गुल्मको टोलीलाई झण्डा तथा टर्च हस्तान्तरण गरेको हो ।
समारोहमा कार्यरथी उपरथी श्री सागर बहादुर थापा, रथीवृन्द, अधिकृतहरुका साथै हनुमानढोका हेरचाह अड्डाका पदाधिकारीहरु एवं राष्ट्रिय सेवादलका छात्रछात्राहरु लगायतको उपस्थिति थियो ।