काठमाडौंको फर्पिङ, नागढुङगा र भक्तपुरको कमनविनायकबाट मदिरा पिएर सवारी साधन चलाउदै गर्दा शनिबार राती पक्राउ परेका ३ जना चालकलाई आइतबार अभद्र व्यवहारमा मुद्धा चलाइएको छ ।
काठमाण्डौको फर्पिङबाट शनिबार पक्राउ परेका ना १ ज ६६ २४ नम्बरको टाटा सुमो चालक मकवानपुरको हेटौडाका २८ वर्षीय मनोज रुम्बा प्रहरी वृत किर्तीपुरबाट अभद्र व्यवहार मुद्धामा चारदिन म्याद थप गरी आवश्यक अनुसन्धान शुरु गरेको छ ।
यस्तै, नागढुङगाबाट पक्राउ परेका ना २ ख ८२ १५ नम्बरको ट्रक चालक रुपन्देही घर भएका ३९ वर्षीय शैलेन्द्र लोधलाई प्रहरी वृत थानकोटबाट अभद्र व्यवहारमा मुद्धामा सात दिन म्याद थप गरि अनुसन्धान भइरहेको छ ।
भक्तपुरको कमलबिनायकबाट ना ४ ख ५१२ नम्बरको टिपर चलाउँदै गरेका चालक काभ्रेपलाञ्चोक घर भएका २४ वर्षीय नबिन मिजारलाई पनि अभद्र व्यवहारमा मुद्धामा पाँच दिन म्याद थप गरी प्रहरी वृत जगातीबाट अनुसन्धान शुरु गरिएको काठमाडौं उपत्यका ट्राफिक प्रहरी कार्यालय रामशाहपथका प्रवक्ता एवं प्रहरी वरिष्ठ उपरिक्षक राजेन्द्र प्रसाद भट्टले बताए ।
रमाइलोको बहानामा पिएको नशालु पदार्थले मस्तिष्कको सोचाई क्षमतामा ह्रास आउने र सवारी साधनको रफ्तार समेत आंकलन गर्न नसक्ने हुँदा गम्भीर सवारी दुर्घटना हुने जोखिमलाई नकार्न नसकिने भएकाले सम्भावित दुर्घटना रोकथामका लागी रात्रिकालिन मा.प.से चेकजाँचलाई ट्राफिक प्रहरीले तिव्रता दिईएको समेत उनले बताए ।
यसअगाडि मापसे गरेर भाडाको ट्याक्सी चलाउने ड्राइभरलाई पनि अभद्र व्यवहार मुद्दा चलाइएको थियो ।
