काठमाडौँ । विभिन्न मितिमा हराएका २१ वटा दुई पाङग्रे सवारी साधन खोजी गरी काठमाडौँ उपत्यका ट्राफिक प्रहरी कार्यालयले शुक्रवार सम्बन्धित धनीलाई हस्तान्तरण गरेको छ ।
काठमाडौँ उपत्यका ट्राफिक प्रहरी कार्यालयमा शुक्रवार एक कार्यक्रमकाबीच प्रहरी नायब उपरीक्षक रविन कार्कीले १४ मोटरसाइकल र ७ स्कुटर धनीलाई हस्तान्तरण गरेका हुन् ।
योसँगै चालु आर्थिक वर्षमा १ सय ११ वटा दुई पाङ्ग्रे सवारी साधन धनीलाई जिम्मा लगाइएको प्रहरी नायब उपरीक्षक कार्कीले बताए ।
उक्त सवारी साधनहरू खोजतलासको क्रममा काठमाडौँ उपत्यकाका धर्मस्थली, नेपालटार, बालाजु, नयाँ बसपार्क, सोह्रखुट्टे, सुकेधारा, बौद्ध, जम्बुडाँडा, सातदोबाटो, अनामनगर, कालीमाटी, थापाथली, थानकोट, ठिमी लगायतका स्थानमा ट्राफिक प्रहरीले फेला पारेको थियो ।
यस आर्थिक वर्षमै ७ वटा चोरीका मोटरसाइकल सहित आठ जनालाई ट्राफिक प्रहरीले नियन्त्रणमा लिएर आवश्यक अनुसन्धान तथा कारबाहीका लागि विभिन्न प्रहरी कार्यालय पठाइसकेको छ ।
सवारी साधन चोरी हुन तथा हराउनबाट जोगाउन आफ्नो सवारी साधन सुरक्षित स्थानमा पार्किङ गर्ने, ह्वील लक, चेन लक, ह्यान्डिल लक, डिस्क लक, लगायत सुरक्षा साइरनहरू जडान गर्नुका साथै मानिसहरूको आवत जावत नहुने एकान्त स्थानमा पार्किङ नगर्न काठमाडौँ उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्र प्रसाद भट्टले अनुरोध गर्दै आइरहेका छन् ।
सवारी साधन हराएमा ट्राफिक प्रहरीको हटलाइन नम्बर १०३, नेपाल प्रहरीको हटलाइन नम्बर १०० मा फोन गर्न र नजिकको प्रहरी कार्यालयमा निवेदन दिन सकिने छ ।
