मङ्सिर ४ गते भएको प्रतिनिधि सभा सदस्य निर्वाचनमा उम्मेदवारी दिएका दुई हजार ४११ उम्मेदवारमध्ये केही उम्मेदवारले आफूले हालेको एक मत मात्र पाएका छन् ।
आफ्नो परिवार र साथीभाइहरूको समेत भोट नपाउने उम्मेदवारहरू सबै स्वतन्त्र उम्मेदवारी दिएका उम्मेदवार हुन् । निर्वाचन आयोगको तथ्याङ्क केलाउने हो भने दुई हजार ४११ उम्मेदवारमध्ये नौ जना उम्मेदवारहरूले एक मत मात्र पाएका छन् । तीन वटा निर्वाचन क्षेत्रको पुन:मतगणना हुने भएकाले यो सङ्ख्या अझै बढ्न सक्ने सम्भावना पनि छ ।
लैङ्गिक रूपमा हेर्दा यी नौ जनामा दुई जना महिला र सात जना पुरुष उम्मेदवार हुन् । गत स्थानीय तहको निर्वाचनमा प्रमुख पद (मेयर र गाउँपालिका अध्यक्ष) मा उम्मेदवारी दिएकामध्ये ३१० जनाले मात्र एक भोट पाएका थिए ।
प्रतिनिधि सभाको निर्वाचनमा एक भोट पाउनेमा मोरङबाट, धनुषा र चितवनबाट दुई/दुई जना र काठमाडौँबाट तीन जना उम्मेदवार छन् । मोरङको निर्वाचन क्षेत्र नम्बर ३ मा उम्मेदवार बनेकी चन्द्र कला खत्रि र प्रकाश भट्टराईले एक भोट मात्र पाए । धनुषाको निर्वाचन क्षेत्र नम्बर ४ बाट उम्मेदवारी दिएका प्रशुराम कुमार यादब र संजय कुमार यादवले पनि एक भोट मात्र पाए । काठमाडौँको निर्वाचन क्षेत्र नम्बर १ बाट उम्मेदवारी दिएकी खुमकला लामिछाने र सोही निर्वाचन क्षेत्रका उम्मेदवार दुर्गा प्रसाद लिम्बुलाई पनि आफू बाहेक अन्य मतदाताले भोट हालेनन् । त्यस्तै काठमाडौँ- ४ बाट उम्मेदवार बनेका महेश्वर केसीले समेत परिवार/ आफन्त/ साथीभाइको मत पाउन सकेनन् ।
चितवन क्षेत्र नम्बर १ बाट उम्मेदवार बनेका तिलक मणी पाठक र क्षेत्र नम्बर ३ बाट उम्मेदवार बनेका भिम्सीन बस्नेत पनि एक मत मात्र पाए ।
निर्वाचनमा मनोनयन गर्नको लागि प्रत्यक्षको लागि प्रतिउम्मेदवार रु १० हजार धरौटी राख्नुपर्ने प्रतिनिधि सभा निर्वाचन ऐन, २०७४ को दफा ७० मा उल्लेख छ । सोही दफामा महिला र दलित वा अल्पसङ्ख्यक समुदाय वा आर्थिक रूपले विपन्न उम्मेदवारको हकमा ५० प्रतिशत छुट हुने उल्लेख छ ।
सोही ऐनको दफा ७१ मा प्रत्यक्ष निर्वाचनमा सहभागी उम्मेदवारले कुद सदर मतको दश प्रतिशतभन्दा कम मत पाएको खण्डमा उक्त उम्मेदवारको धरौटी जफत हुने उल्लेख छ । देशभर कति उम्मेदवारहरूको धरौटी जफत भयो र यसबाट सरकारको ढुकुटीमा कति रकम जम्मा भयो भन्नेबारेमा हामीले अर्को रिपोर्ट सार्वजनिक गर्नेछौँ ।