वैशाख ३० गते सम्पन्न भएको स्थानीय चुनावमा पालिका प्रमुख पदमा उम्मेदवारी दिएका तीन सय १० उम्मेदवारले आफ्नो मात्रै भोट पाएका छन् ।
यसरी आफ्नो परिवारको सदस्यको समेत भोट पाउन नसक्नेमा सत्ता गठबन्धनमा रहेका नेकपा एकीकृत समाजवादी र जनता समाजवादी पार्टी, नेपालबाट उम्मेदवारी दिएका समेत छन् ।
त्यस्तैगरी विवेकशील साझा पार्टी, नेपाल मजदुर किसान पार्टी, नेपाली कांग्रेस (बी.पी.) लगायत स्वतन्त्रसहित १२ राजनैतिक दलका उम्मेदवारहरूले प्रमुख पदमा एक भोट मात्र पाएका हुन् ।
तिनीहरूमध्ये महिलाको सङ्ख्या १४ रहेको छ भने बाँकी २९६ जना पुरुष हुन् ।
कर्णाली प्रदेशको दैलेख जिल्लामा रहेको भैरवी गाउँपालिकाको प्रमुख पदमा नेकपा एसबाट जगत प्रसाद आचार्यले उम्मेदवारी दिएका थिए तर अन्तिम नतिजामा उनले एक भोट मात्र पाए । त्यो भोट उनी आफैले हालेको भोट हो ।
त्यस्तै गण्डकी प्रदेशको लमजुङ जिल्लामा रहेको मर्स्याङ्दी गाउँपालिका प्रमुखमा जसपाबाट उम्मेदवारी दिएका बसन्त बहादुर थापाले पनि १ भोट मात्र पाए ।
प्रदेशगत रुपमा हेर्नेहो भने प्रदेश १ मा १४ जना, मधेश प्रदेशमा २०९ जना, बागमती प्रदेशमा ४५ जना, गण्डकी प्रदेशमा ७ जना, लुम्बिनी प्रदेशमा २९ जना, कर्णाली प्रदेश र सुदूरपश्चिम प्रदेशमा समान ३ जना उम्मेदवारले एक भोट मात्र पाएका हुन् ।
प्रमुख पदमा उम्मेदवारी दिएका २९७ जना स्वतन्त्र उम्मेदवारले एक भोट मात्र पाएका छन् ।
प्रदेश १ मा प्रमुख पदमा स्वतन्त्र उम्मेदवारले मात्र एक भोट पाउँदा बाँकी ६ प्रदेशमा विभिन्न राजनैतिक दलका उम्मेदवारहरूले पनि एक भोट मात्र पाएका हुन् ।
यी हुन् १ भोट मात्र पाउने उम्मेदवारहरू