क्रिकेटर सन्दीप लामिछाने विरुद्धको बलात्कार मुद्दामा लामिछानेको तर्फबाट बहस गरेका वकिलहरूले पीडित नाबालिक नभएर १८ वर्षभन्दा माथि उमेरको भएको भन्दै जन्मदर्ताको कागजातहरू पेश गरेका छन् ।
जिल्ला अदालत काठमाडौंका न्यायाधीश माधव घिमिरेको इजलासमा भएको थुनछेक बहसमा पीडित भनिएकी किशोरीको जन्मदर्ता, स्कुलमा भर्ना हुँदाका विवरणहरु, बसाइँ-सराइ कागजहरु पेस गरिएको सन्दीप तर्फबाट बहस गरेका अधिवक्ता मुरारीप्रसाद सापकोटाले बताए।
आज सन्दीपको तर्फबाट बहस गरेकी अर्की अधिवक्ता रोशनी पौडेलका अनुसार जन्मदर्ता तथा स्कुलको विवरण अनुसार पीडित भनिएकी किशोरीको जन्म मिति २०६१ असार १८ गते रहेको छ। उनीहरुले पेस गरेको उक्त विवरण अनुसार घटना भएको मितिमा किशोरीको उमेर १८ वर्ष पूरा भइसकेको हुन्छ।
तर, केटिएम दैनिकसँग सुरक्षित रहेको पीडित भनिएकी किशोरीको जन्मदर्ता अनुसार घटना भएको समयसम्म उनी नाबालिग नै छन् । सोही जन्मदर्ता अनुसार उनको नागरिकता बनेको छ । नागरिकतामा पनि उनको उमेर २०६२ साल जेठ १८ उल्लेख छ । सोअनुसार घटना हुने समयसम्म उनको उमेर १७ वर्ष दुई महिला १७ दिनको देखिन्छ ।
पीडित भनिएकी किशोरीहरुको तर्फबाट अन्य चार जना वकिलहरुले समेत बहस गरेका थिए। विभिन्न संस्थाहरुका तर्फबाट उनीहरुले बहस गरेका हुन्। उनीहरुले पनि प्रतिवादी लामिछानेले बलात्कार गरेको दावी गर्दै कानुन बमोजिम सजाय हुनुपर्ने मागदावी गरे।
भोलि बिहीबार सन्दीपको पक्षबाट बहस गर्ने वकिलहरुको सूचीमा वरिष्ठ अधिवक्ता रमन श्रेष्ठ, लभप्रसाद मैनाली, कृष्णप्रसाद सापकोटा, सविता बराल भण्डारीलगायत छन्।
हिजो मंगलबार सन्दीपले जिल्ला न्यायाधीश माधव घिमिरेको इजलासमा बयान दिएका थिए। बयानका क्रममा सन्दीपले पीडित भनिएकी किशोरीले कसैको उक्साहटमा आफूविरुद्ध उजुरी दिएको बताएका थिए।
१७ वर्षीया किशोरीलाई बलात्कार गरेको आरोपमा पक्राउ परेका सन्दीपविरुद्ध अनुसन्धान सकिएपछि जिल्ला सरकारी वकिल कार्यालय काठमाडौंले सोमबार अदालतमा मुद्दा दायर गरेको थियो। उनीविरुद्ध मुलुकी अपराध संहिता, २०७४ को परिच्छेद १८ को करणीसम्बन्धी कसुरको दफा २१९ को उपदफा (३)को देहाय (घ) अन्तर्गतको कसुर गरेको अभियोग लगाइएको छ।
दफा २१९ को उपदफा (३)को देहाय (घ) मा १६ वर्षभन्दा बढी १८ वर्षभन्दा कम उमेरकी महिलालाई करणी गरेमा १० देखि १२ वर्षसम्म कैद सजाय हुने व्यवस्था छ। सन्दीपविरुद्ध अधिकतम १२ वर्ष जेल सजायको मागदावी गरिएको हो।
सन्दीपले आफूमाथि दुई पटक जबरजस्ती करणी गरेको पीडित युवतीले बयानमा उल्लेख गरेकी छन्। सन्दीपले भने प्रहरीसँगको बयानका क्रममा बलात्कारको आरोप अस्वीकार गरेका छन्। पीडित युवतीसँग होटलमा बसेको, तर बलात्कार नगरेको उनको दावी छ।