साफ महिला फुटबल च्याम्पियनसिपको फाइनलमा पराजित भएपछि नेपाली राष्ट्रिय टिमका प्रशिक्षक कुमार थापाले राजीनामा दिने घोषणा गरेका छन् ।
उपाधि जित्ने लक्ष्य पूरा नभएपछि आफू पद त्याग गर्ने निर्णयमा पुगेको उनले बताए ।
‘आजैको दिनदेखि म यो टिम छोड्छु।’ कुमारले पत्रकार सम्मेलनमा भने, ‘मैले जुन लक्ष्य राखेको थिए। त्यो पुरा गर्न सकिन। अहिलेनै पद त्यागको घोषणा गर्छु। अरुलाई पनि मौका दिनुपर्छ। टिममा बसिरहनु राम्रो होइन। म बस्दा पनि बस्दिन,’
यसअघि सन् २०१६ मा पनि महिला टिमको प्रशिक्षक रहेका थापालाई साफ च्याम्पियनसिपकै लागि अखिल नेपाल फुटबल संघ एन्फाले प्रशिक्षकको जिम्मेवारी दिएको थियो।
दशरथ रंगशालामा भएको छैंटौं संस्करणको साफ महिला फुटबल च्याम्पियनसिपमा नेपाल बंगलादेशसँग ३-१ गोलले पराजित भएको थियो ।