बागलुङमा ससुराले बुहारीलाई यौन दुर्व्यवहार गरेको भिडिओ बाहिरिएको छ । बागलुङ जिल्लाको काठेखोला गाउँपालिका-६ का अन्दाजी ६५ वर्षका पुरुषले यौन दुर्व्यवहार गरेको भिडिओ केटिएम दैनिकलाई प्राप्त भएको हो ।
उक्त भिडिओमा किचनमा काम गरिरहेकी बुहारीलाई आएर जबरजस्ती गरेको जस्तो देखिन्छ । बुहारीले प्रतिकार गर्दा गर्दै पनि उनले जबरजस्ती गरेको देखिन्छ ।
१ मिनेट ३४ सेकेन्डको उक्त भिडियोको ३४ सेकेन्डमा ससुरा आएर जबरजस्ती गरेका हुन् । बुहारीले कस्तो हो, लाज लाग्दैन भनेर रुदैं चिच्याउँदै गर्दा पनि ससुराले जबरजस्ती गरिरहन्छन् ।
केटिएम दैनिकको सम्पर्कमा आएकी २६ वर्षीया पीडित युवतीले भनिन्, ‘श्रीमान् विदेशमा हुनुहुन्छ, मैले ससुरा बुवाले गर्ने दुर्व्यवहारको कुरा सासू, जेठाजु,लगायत घरका सबै परिवारलाई भने । सुरुमा सासुले ससुराबाट गल्ती भयो, एक पटकलाई माफी देऊ भन्नुभयो । पछि अति नै भए पछि मैले यो कुरा श्रीमानलाई पनि सुनाए । हाम्रो राजनीतिक र समाजमा इज्जत भएको परिवार हो । यो कुरा बाहिर ननिकाल भनेर भन्नुभयो ।’
तर पटक पटक यस्ता हर्कत नरोकिएपछि र ‘तँ सँग प्रमाण के छ ?’ भनेर प्रश्न गरेपछि मैले बाध्य भएर म भिडिओ बनाएको हुँ । यहीँ विषयमा पारिवारिक कलह भएपछि मेरो चरित्र माथि हत्या गर्न तर्फ लागियो, उनले भनिन् ।
उक्त भिडिओ प्रमाण बाहिरिने डरले लक्ष्मी (परिवर्तित नाम) लाई घर निकाला समेत गरियो । आफ्नो कर्तुत बाहिर आउने भएपछि ससुराले भतिज पर्ने एक युवकसँग बुहारीको विवाहोत्तर सम्बन्ध भएको आरोप समेत लगाए । लक्ष्मीको विवाहोत्तर सम्बन्ध छ भन्दै परिवारले प्रहरीमा उजुरी गरे । प्रहरीले लक्ष्मीलाई पक्राउ गरेर दुई दिनसम्म हिरासतमा राखे र मिलापत्र गरेर पठाए ।
उक्त मिलापत्रमा भनिएको छ, ‘हामी बिचमा सामाजिक भाइचाराको सम्बन्ध रहेको छ । हामी काकी भतिज असार २२ गते रेष्टुरेन्टमा खाजा खान बसेको अवस्थाको सिसिटिभी फुटेजको विषयलाई लिएर केही व्यक्तिहरूले सामाजिक सम्बन्ध माथि नै गलत टीकाटिप्पणी गरेर हाम्रो चरित्रमाथि समेत आक्षेप लगाउने गरी समाजमा बदनाम गर्ने कार्य गरेकाले हामी बिच काकी भतिजबाहेक कुनै सम्बन्ध छैन ।’
‘अबका दिनमा हामीहरूको बिचको सम्बन्धमा गलत आक्षेप लगाएमा वा हाम्रा बिच लेखिए विपरीत काम भइगरेमा कारणी दायित्व र सजाय भोग्न भोगाउन मन्जुर गर्दछौँ’ मिलापत्रमा भनिएको छ ।’
यो प्रकरण बाहिरिएपछि विदेशमा रहेका श्रीमानले पोर्चुगल स्थित राजदूतावासमा ‘अधिकृत वारिसनामा गरिपाऊ’ भनेर निवेदन लेखेका छन् । उक्त पत्रमा पारिवारिक बेमेल भएका कारण आफूले सम्बन्ध विच्छेद गर्न चाहेकोले आफ्नो भाइलाई वारिसनामा गरिदिन आग्रह गरेका हुन् ।
पत्रमा लेखिएको छ, ‘२०७५।११।१० गते सामाजिक परम्परा अनुसार वैवाहिक सम्बन्ध कायम भए पनि हाल निज सँग मेरो पारिवारिक बेमेल बढेकाले दाम्पत्य जीवन अगाडी बढाउन नसक्ने ठानी निज लक्ष्मी (परिवर्तित नाम) विरुद्ध सम्बन्ध विच्छेद मुद्दा सम्मानित बागलुङ जिल्ला अदालतमा दर्ता गराउन परेकोमा हाल म विदेश पोर्चुगलमा वैदेशिक रोजगारका सिलसिलामा रहेकोले आफै उपस्थित भई उक्त सम्बन्ध विच्छेद मुद्दा दायर गरी, तारेख लिई पुर्पक्ष गर्न,अंश नदिने गरी मुद्दा मिलापत्र गर्न,मुद्दा फिर्ता लिन वा पुनरावेदन गर्न वा म उपर कुनै मुद्दा दायर भएमा म्याद बुझी प्रतिउत्तर लगाई मिलापत्र गर्न वा अन्य कुनै पनि अदालती मुद्दा मामिला गर्न असम्भव भएकोले मेरो सट्टामा मुलुकी देवानी कार्यविधि संहिता, २०७४ को दफा १५३ को उपदफा १,२ र ३ बमोजिम ऐनले अधिकृत वारेसनामा लेखी दिन हुन फलानोलाई वारेसनामाको कागज लेखी दिई पठाएको छु।’
यता श्रीमती भने आफ्नो कुनै पनि गल्ती नभएकोले सम्बन्ध विच्छेद गर्ने प्रक्रियामा नजाने बताउँछिन् । उनले भनिन्, ‘मेरो कुनै गल्ती नै छैन, नाताले भतिज पर्ने व्यक्ति र उनको श्रीमतीसँग मेरो राम्रो सम्बन्ध छ । मैले गरेको कल रेकर्ड र म्यासेजको आधारमा म माथि आरोप लगाइएको हो ।’
‘देवरले आइतबार १२:३० बजे घर आउनु हैन भने हामी मुद्दा हालिदिन्छौँ भनेर बोलाउनु भएको छ । अहिले म माइतमा नै छु, के गर्ने भनेर अधिवक्तासँग सल्लाह गरेर अगाडि बढ्छु ।’ उनले भनिन् ।
‘यता पीडक परिवार भनेर उक्त भिडिओ एडिट गरेर बनाएको दाबी गर्छ । उनीहरू भने बुहारीको विवाहोत्तर सम्बन्धको बारेमा आफूले थाहा पाएपछि अनावश्यक आरोप लगाएको बताउँछन् । प्रहरीमा उजुरी परेपछि भिडिओको बारेमा निष्पक्ष छानबिन गरेर न्याय दिन्छ भन्ने कुरामा हामी विश्वस्त छौँ ।’ पीडक परिवारका एक सदस्यले भने ।
नोट : यस समाचारले पीडक भनिएको पक्षलाई आघात पुगेको भन्दै समाचारको खण्डन प्राप्त भएपछि प्रकाशित गरिएको छ । समाचारको खण्डन यस लिंकबाट हेर्न सकिन्छ ।