केटिएम दैनिक (ktmdainik.com)मा मिति २०७९ साउन १४ गते प्रकाशित ‘बुहारीमाथि ससुराले यौन दुर्व्यवहार गरेको आरोप !’ शीर्षकको समाचार एकतर्फी रुपमा, दोस्रो पक्षको कुनै जानकारी र आफ्नो कुरा राख्न पाउने संवैधानिक तथा पेसागत मर्यादा (पत्रकार आचारसंहिता समेत)ले गरेको व्यवस्था विपरीत प्रकाशित भएको छ ।
समाचारमा उल्लेखित घटना सबै काल्पनिक हुन् । पारिवारिक रुपमा हुने विभिन्न घटनालाई जोडेर, परिवारका सदस्यलाई अनैतिक ढंगले प्रभावमा पारेर, बाहिरी व्यक्तिको उक्साहटमा उक्त समाचार ठहर पारिएको हुनुपर्छ । नभएको घटनालाई पनि भएकै हो भन्ने जसरी एकतर्फी रुपमा प्रकाशित भएको हो ।
पीडित भनिएका व्यक्तिबाट पारिवारिक मर्यादामा आँच पुग्ने गरी भएका केही घटनाका सन्दर्भमा उनको गल्ती रहेको कुरा स्मरण गराउनुलाई बलात्कारजस्तो गम्भीर फौजदारी कसूरसँग जोड्नु कुनै पनि किसिमले उचित र न्यायोचित हुँदैन । यो समाचार प्रकाशनका सन्दर्भमा सञ्चारमाध्यमका तर्फबाट हामीमा पर्न गएको क्षतिले हामी मर्माहत छौं ।
आम पाठक, हाम्रो शुभचिन्तक, आफन्त र परिवारका सदस्यलाई हामी अनुरोध गर्दछौं, यो समाचारमा उल्लेख भएका कुनै पनि घटना सत्य होइनन् । समाचार प्रकाशन गर्ने पक्षले आफ्ना गल्ती स्वीकार गर्दै उक्त सन्दर्भमा आफ्नो पक्षबाट कानुनअनुसार सुधार गर्नुहुनेछ भन्ने हाम्रो अपेक्षा छ ।
मर्का पर्ने पक्ष
समाचारको विषयमा केटिएम दैनिकको प्रष्टिकरण
उक्त समाचार केटिएम दैनिकले पाएको सूचनाको आधारमा लेखेको हो । त्यसमा दुवै पक्षलाई समेटिएको छ ।
केटिएम दैनिकले प्राप्त गरेको भिडिओ, काकी भतिज निर्दोष हुन् भनेर गरिएको कागजपत्र, पीडित भनिएकी महिलासँगको कुराकानी, विदेशबाट सम्वन्धविच्छेदको लागि आएको चिठ्ठी लगायत विभिन्न प्रमाणहरूको आधारमा समाचार तयार गरिएको हो ।
समाचार तयार गर्ने क्रममा भुलवस पीडक भनिएको पक्षको नाम पर्न गएकोमा सम्वन्धित पक्षसँग क्षमा माग्दै थाहा पाउने वित्तिकै हटाइएको हो । हाम्रो उद्देश्य कसैलाई चोट दिनु वा आघात पुर्याउनु हैन । साथै गोपनियता पनि ख्याल गरिएको छ ।
उक्त सूचना हामीलाई चार दिन अगाडि नै प्राप्त भएको थियो । तर प्रयाप्त प्रमाण जुटाउनको लागि हामीले केही समय कुर्यौँ ।
केटिएम दैनिकले प्राप्त गरेको भिडिओ र प्रमाणहरू सुरक्षित छन् । सम्वन्धित निकायले हेर्न खोजेको खण्डमा उपलव्ध हुन्छन् ।
सम्पादक
