हिमालय एअरलाइन्सले काठमाडौंबाट कुवेतको उडान सुरु गरेको छ । एअरलाइन्सले हिजो (शुक्रबार) पहिलो उडान सफलतापूर्वक सञ्चालन गरेको हो ।
उक्त उडान शुक्रबार राती ११:३२ मा कुवेत प्रस्थान गरेकोमा शनिबार बिहान ९:१७ मा काठमाडौं अवतरण गरेकआ हो । एअरलाइन्सले अब हरेक शुक्रबार काठमाडौंदेखी कुवेत र हरेक शनिबार कुवेतदेखी काठमाडौं उडान सञ्चालन गर्नेछ ।
कुवेत विशेष गरी रोजगारी र व्यापारिक उद्देश्य लिएर जाने नेपालीहरूका लागि महत्त्वपूर्ण गन्तव्य हो । नेपाल र कुवेतबीच मैत्रीपूर्ण र सौहार्दपूर्ण सम्बन्ध रहेकोमा हिमालय एअरलाइन्स्द्वारा काठमाडौं-कुवेत-काठमाडौं सेक्टरको उद्घाटनले दुई राष्ट्रबीचको सम्बन्धलाई अझ प्रगाढ बनाउने विश्वास गरिएको छ ।
नेपाल र कुवेतबीच जनवरी २३, २००६ मा हवाई सेवा सम्झौता भएको थियो । यस सन्दर्भमा काठमाडौंलाई कुवेतसँग सीधा जोड्ने नेपालको पहिलो वायुसेवा कम्पनी हिमालय एअरलाइन्सको बनेको छ ।
यस अवसरमा कम्पनीका प्रशासनिक उपाध्यक्ष, विजय श्रेष्ठले भने, “हिमालय एअरलाइन्स् एक प्रगतिशील वायुसेवा कम्पनी हो जसले यात्रुहरूलाई प्रभावकारी अन्तर्राष्ट्रिय हवाई सेवा उपलब्ध गराउँदै आएको छ । हिमालयले काठमाडौं–कुवेत–काठमाडौं सेक्टरको सुरुवात पनि सोही भावना अनुरुप गरेको हो ।”
यस एअरलाइन्स् ले हाल मध्यपूर्व र दक्षिण एशियाका प्रमुख देशहरू युएई , मलेसिया, कतार, साउदी अरेबिया र बंगलादेशलगायतका देशहरुमा यात्रुवाहक उडानहरू सञ्चालन गरिरहेको छ भने कार्गो उडानहरू विशेष रूपमा चीनबाट र चीनसम्म सञ्चालन गरिरहेको छ।