नेपाल नागरिक उड्डयन प्राधिकरणले जुलाई महिनाको लागि अन्तर्राष्ट्रिय उडानहरूको तालिका सार्वजनिक गरेको छ ।
सार्वजनिक भएको तालिकामा राष्ट्रिय ध्वजा बाहक नेपाल एयरलाइन्सले सातामा ६ उडान भर्न पाउने भएको छ भने यती एयरलाइन्सको लगानी भएको हिमालयन एयरलाइन्सले सातामा ४ उडान भर्न पाउने भएको छ ।
सातामा २१ उडान खुल्ला गरेको प्राधिकरणले अन्य विदेशी वायुसेवा कम्पनीको लागि ११ वटा उडानको स्वीकृति दिएको छ । कतार एयरवेज, जजीरा एयरवेज र टर्कीश एयरलाइन्सले सातामा २–२ उडान भर्ने अनुमति पाएका छन् । यस्तै, एयर अरेबिया, मालिन्दो एयर, एयर इण्डिया, फ्लाइ दुबई र सलाम एयरले हप्तामा १–१ उडान भर्नेछन् ।
नेपाल वायुसेवा निगमका जहाजले जुलाई महिनामा हप्ताको ६ वटा उडान मार्फत नियमित अन्तर्राष्ट्रिय गन्तव्यमा उडान भर्नेछ । प्राधिकरणको स्वीकृतिअनुसार नेपाल एयरलाइन्सले आइतबार र मङ्गलवार कतारको दोहा उडान भर्नेछ भने बुधवार दोहा र दिल्ली दुई वटा उडान एकै दिन भर्नेछ । यस्तै, शुक्रवार जापानको नारिता उडान भर्ने यकिन भएको नेपाल एयरलाइन्सले शनिवार भने मलेसियाको क्वालालम्पुर उडान भर्ने अनुमति पाएको छ ।
नयाँ तालिकाअनुसार आइतबार एउटा मात्रै उडान हुने छ भने सोमबार, मङ्गलवार, बुधवार र बिहीबार ३–३ वटा र शुक्रवार र शनिवार ४–४ वटा उडान हुनेछन् ।