लोकतन्त्रवादी पत्रकारहरुको छाता संगठन नेपाल प्रेस यूनियनको नवौं राष्ट्रिय महाधिवेशनको तयारी अन्तिम चरणमा पुगेको छ ।
सत्तारुढ नेपाली कांग्रेसको शुभेच्छुक संस्थाको रुपमा रहेको युनियनको आगामी साउन ६ र ७ गते बाग्मती प्रदेशको राजधानी हेटौंडामा हुने महाधिवेशनका लागि लोकतान्त्रिक धारमा रहेका पत्रकारहरुले सामाजिक सञ्जालमार्फत विभिन्न पदमा उम्मेदवारी घोषणा गर्ने लहर पनि चलेको छ ।
यही सेरोफेरोमा नेपालबहस डटकमकी समाचार प्रमुख कुसुम बिक (सेञ्चुरी) ले समावेशी तर्फको उपमहासचिव पदमा उम्मेदवारी घोषणा गरेको छिन् । कक्षा ८ पढ्दै गर्दादेखि रेडियो पत्रकारिताबाट आफ्नो क्यारिएर शुरु गरेकी कुसुमले १७ बर्ष भन्दा बढी समय पत्रकारितामा बिताइसकेकी छिन् ।
उनले यसअघि फूलबारी एफएम, रासस, रेडियो अन्नपूर्ण, देशान्तर र नाइस टीभीमा समाचार वाचिकाको रुपमा कुशलतापूर्वक जिम्मेवारी निभाएर पत्रकारिता क्षेत्रमा स्थापित भइसकेको छिन् ।
कुसुमले प्रेस स्वतन्त्रता, ट्रेड युनियन अधिकार, पेशागत सुरक्षा र मर्यादित पत्रकारिताका लागि नेपाल प्रेस युनियनको उपमहासचिव पदमा उम्मेदवारी दिन लागेको बताइन् ।
‘लोकतान्त्रिक मूल्य मान्यताबाट विचलित हुन नदिन सरोकारवाला निकायहरुलाई सही मार्गमा डोहोर्याउन खबरदारी गर्नसक्ने हैसियतको संस्था प्रेस युनियनलाई अझ सशक्त र सुदृढ बनाउन मैले उपमहासचिव पदमा उम्मेदवारी दिने निर्णय गरेकी हुँ ।’ उनले भनिन् ।
