पत्रकारिता छोडेर राजनीतिमा होमिएका प्रदेश १ का दुई महिला पत्रकार गाउँपालिका उपाध्यक्ष बनेका छन्। स्थानीय तह निर्वाचनअन्तर्गत ताप्लेजुङकी शान्ता आङबुहाङ र सोलुखुम्बु बिना राई पालिका उपाध्यक्षमा निर्वाचित भएका हुन्।
आङबुहाङ नेपाल पत्रकार महासंघको केन्द्रीय सदस्यसमेत थिइन्। उनी महिला आदिवासी जनजातितर्फ केन्द्रीय सदस्यमा निर्वाचित भएकी थिइन् । स्थानीय तहको निर्वाचनमा उम्मेदवार बन्न आङबुहाङले नेपाल पत्रकार महासंघको केन्द्रीय सदस्यबाट राजीनामा दिएकी थिइन् ।
शान्ता ताप्लेजुङको आठराई त्रिवेणी गाउँपालिका उपाध्यक्षमा निर्वाचित भएकी छन्। नेकपा एमालेबाट उपाध्यक्षको टिकट पाएकी शान्ताले नेकपा माओवादी केन्द्रका प्रजिन हाङवाङलाई हराएकी हुन्। मंगलबारको अन्तिम मतमपरिणाअनुसार २८ सय १९ मत पाइन् भने हाङवाङले २४ सय १४ मत ल्याए।
गाउँपालिकाको अध्यक्षमा एमालेकै दिपेन्द्र पोमु निर्वाचित भए। पोमुले तीन हजार ३६ मत प्राप्त गर्दा उनका निकटम् प्रतिद्वन्द्वी नेपाली कांग्रेसका विश्वनाथ सिटौलाले २५ सय २६ मत पाए।
यस्तै, पत्रकार महासंघ सोलुखुम्बु शाखाको उपाध्यक्षसमेत रहेकी बिना भने नेचासल्यान गाउँपालिकाको उपाध्यक्षमा निर्वाचित भइन्। बिनाले पनि निर्वाचनमा होमिनुअघि पत्रकार महासंघको जिम्मेवारीबाट बिदा लिएकी थिइन्।
नेपाली कांग्रेसबाट उम्मेदवार बनेकी उनले २९ सय ६ मत ल्याएर जित दर्ता गरिन्। उनकी प्रतिस्पर्धी नेकपा एमालेकी सिर्जना राईले १७ सय १८ मत ल्याइन्। सो गाउँपालिका अध्यक्षमा भने कांग्रेसकै धनजन राई विजयी भए। राई २५ सय ७९ मतसहित विजयी हुँदा उनका प्रतिद्वन्द्वी एमालेका डुफकुमार बाँस्तोलाले २३ सय १३ मत पाए।