आज (शुक्रबार) संघियता पछि दोस्रो पटक स्थानीय तहको निर्वाचन हुन गइरहेको छ । आज हुने स्थानीय तह निर्वाचनमा देशका शिर्ष नेताहरु मतदान गर्न आफ्नो गृह जिल्ला लागिसकेका छन्।
प्रधानमन्त्री तथा नेपाली कांग्रेसका सभापति शेरबहादुर देउवा केही दिन यता गृहजिल्ला डडेल्धुरामा रहेका छन्। प्रधानमन्त्री देउवाले डडेल्धुराको गन्यापधुरा गाउँपालिकाको रुवाखोलास्थित असिग्राम माध्यामिक विद्यालयस्थित मतदान केन्द्र (ख) बाट मतदान गर्नेछन् ।
त्यस्तै पूर्वप्रधानमन्त्री तथा नेकपा एमालेका अध्यक्ष केपी शर्मा ओलीको संसदीय निर्वाचन क्षेत्र झापा ५ भएपनि उनको मतदाता नामावली भक्तपुर सुर्यविनायक नगरपालिकाको बालकोटमा रहेको छ। ओलीले भक्तपुरको सूर्य विनायक नगरपालिका–२ बालकोटस्थित महेन्द्र शान्ति माविस्थित ‘क’ मतदान केन्द्रबाट मतदान गर्नेछन् ।
पूर्वप्रधानमन्त्री तथा नेकपा (माओवादी केन्द्र) का अध्यक्ष पुष्पकमल दहाल प्रचण्डले चितवनको भरतपुर महानगरपालिका वडा नं १४, शान्तिपुरबाट मतदान गर्नेछन्। प्रचण्ड संसदीय निर्वाचनमा पनि चितवनबाट नै प्रतिनिधित्व गर्छन्।यो पालिकाबाट उनी छोरी रेणु दाहाल मेयरको उम्मेदवार छिन् ।
पूर्वप्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपालले रौतहटको गौर नगरपालिका वडा नम्वर २ मा मतदान गर्नेछन्। उनले त्यहाँको जुद्ध मा.वि केन्द्रमा गएर मतदान गर्ने छन् । तर उनको संसदीय निर्वाचन क्षेत्र भने काठमाडौं क्षेत्र नम्वर २ रहेको छ।
त्यस्तै अर्का पूर्वप्रधानमन्त्री तथा नेकपा एसका सम्मानित नेता झलनाथ खनालले इलामको सुर्योदय नगरपालिका वडा नम्वर १ मा मतदान गर्नेछन्।
जनता समाजवादी पार्टी (जसपा)का अध्यक्षले उपेन्द्र यादवले स्नातकोत्तर क्याम्पस, विराटनगर मोरङको मतदानस्थलमा मतदान गर्नेछन्। तर उनको पनि संसदीय निर्वाचन क्षेत्र सप्तरी रहेको छ।
त्यस्तै पूर्वप्रधानमन्त्री तथा जसपाका संघीय परिषद्का अध्यक्ष डा. बाबुराम भट्टराईले गोरखा जिल्लाको पालुङ्टार नगरपालिका वडा नम्वर १ मा मतदान गर्नेछन्। भट्टराईले संसदीय निर्वाचनमा पनि सोही क्षेत्रबाट नै प्रतिनिधित्व गर्छन्।
लोकतान्त्रिक समाजवादी पार्टी (लोसपा)का अध्यक्ष महन्थ ठाकुरले भने सर्लाहीको बलरा नगरपालिकाबाट मतदान गर्नेछन्।
सत्तारुढ दल नेपाली कांग्रेसका वरिष्ठ नेता रामचन्द्र पौडलल तनहुँको व्यास नगरपालिका वडा नम्बर २ मा रहेको सत्यवती मावि केन्द्रबाट मतदानमा सहभागि हुने छन् । सो पार्टीका नेता शेशर कोइराला भने मोरङको विराटनगर महानगरपालिका वडा नम्बर ७ को आदर्श मावि केन्द्रबाट भोट हाल्ने छन् ।
मन्त्रिपरिषद्का पूर्वअध्यक्ष तथा पूर्व प्रधानन्याधिस खिलराज रेग्मीले काठमाडौँको मध्यबानेश्वमा रहेको मतदान केन्द्रबाट मतदानमा भाग लिनेछन् ।
प्रतिनिधी सभाका सभामुख अग्निप्रसाद सापकोटाले सिन्धुपाल्चोकको चौतारमा सागाचोकगढी नगरपालिका वडा नम्बर ४ मा रहेको सेतिदेवी पन्चकन्या मा.वि केन्द्रबाट निर्वाचनमा भोट खसाल्ने छन् । राष्ट्रियसभाका अध्यक्ष गणेशप्रसाद तिमिल्सिनाले पर्वतको मोदी गाउँपालिका–७ राम्जास्थित पशुपति माविमा रहेको मतदान केन्द्रबाट मतदान गर्नेछन् ।
राप्रपा नेपालका अध्यक्ष कमल थापाले शुक्रबार हेटौंडा उपमहानगरपालिका ६ स्थित वंशगोपाल उच्च मावि मतदान केन्द्रमा मतदान गर्ने भएका छन् ।